Os Reis Meigos chegan a Ourense con tres toneladas de caramelos para repartir

A Cabalgata de Reis Meigos de Ourense sairá o vindeiro domingo, día 5, ao redor das 18.00 horas, da estación do tren con destino á praza Maior da cidade. Será coa repartición de tres toneladas de caramelos entre os asistentes. Este ano, a cabalgata non pasará pola Avenida das Caldas, ao atoparse en obras, polo que os Reis Meigos e a súa comitiva avanzarán desde a estación pola rúa Xesús Pousa, Ponte do Milenio, Pavillón dos Remedios e a rúa do Progreso ata acabar na Praza Maior.

Melchor, Gaspar e Baltasar chegarán en tren á estación de Ourense ao redor das 17.30 horas. Sobre ás 18.00 horas, sairá a cabalgata, cunha comitiva formada por unha vintena de grupos de animación e carrozas: as tres dos reis máis unha musical, na que actuará o grupo Broken Peach. Desde a súa saída ás 18.00 horas na estación do tren, a Cabalgata fará un percorrido con finalización prevista ao redor das 19.30 horas na praza Maior, onde terá lugar a recepción real.

Os Reis Meigos visitarán o portal de Belén instalado pola Asociación de Belenistas nos soportais da Casa do Concello e, a continuación, saudarán o público asistente desde o balcón do salón de plenos. A organización lembra que á Praza Maior accederán os Reis Meigos e a súa comitiva de acompañantes, pero non as carrozas. Tamén informa de que o público non poderá presenciar a Cabalgata na Ponte do Milenio nin na rúa Doutor Marañón. Como en anos anteriores, tamén haberá espazos reservados para persoas con mobilidade reducida, na estación de tren, nos antigos xulgados e na Praza de Bispo Cesáreo.

Reis Meigos en Ourense | Fonte: Rosa Veiga - Arquivo