Crece case un 20% a compravenda de vivendas en novembro
Encadea oito meses de crecemento.
Por Europa Press / Redacción | SANTIAGO DE COMPOSTELA | 09/01/2025 | Actualizada ás 11:41
A compravenda de vivendas creceu en Galicia un 19,5% e os préstamos hipotecarios un 32,7%, segundo datos relativos a novembro do Centro de Información Estatística do Notariado. En ambos os indicadores o aumento rexistrado nese mes no conxunto de España foi do 9% e do 24%, respectivamente.
"Cunha caída do 3,2% no prezo do metro, foi unha das dúas únicas autonomías en que abaratou o custo da vivenda respecto ao ano anterior", sinalan desde a entidade notarial galega.
Con estes datos, Galicia encadea así oito meses de crecemento en compravendas e 12 en formalización de hipotecas. En Galicia o número de compravendas alcanzou en novembro as 2.477 unidades e o prezo medio do metro cadrado situouse nos 1.158 euros, cunha caída do 3,2% "que converte á comunidade autónoma nunha das dúas nas que abaratou o custo da vivenda, fronte a un encarecemento do 5,9% no conxunto de España".
Por tipo de vivenda, producíronse 1.800 compravendas de pisos, un 19,9% máis que no mesmo mes de 2023, e 677 de unifamiliares, un 18,6% máis. O prezo dos pisos diminuíu un 8,5%, ata o 1.472 euro/metro cadrado de media, mentres que o das vivendas unifamiliares subiu un 17,1% interanual, situándose en 761 euros/metro cadrado.
