A Estrada iniciará antes de verán un proxecto piloto de hemodiálise intermedia entre o centro de saúde e o domicilio

O conselleiro de Sanidade, Antonio Gómez Caamaño, anunciou este venres a posta en marcha, antes do verán, dun proxecto piloto pioneiro de hemodiálise intermedia entre o centro de saúde da Estrada e o domicilio. Desta forma, destacan nun comunicado, este centro da rede sanitaria pública galega seguirá "sendo referencia e estando á vangarda".

Gómez Caamaño visitou este venres o centro acompañado polo conselleiro de Cultura, José López Campos; o delegado da Xunta en Pontevedra, Agustín Reguera Ocampo; a directora xeral de Planificación e Reforma Sanitaria, Sofía López Linares; e o xerente da área sanitaria de Santiago de Compostela e Barbanza, Ángel Facio Villanueva. O proxecto estará coordinado polo Servizo de Nefroloxía do Complexo Hospitalario Universitario de Santiago. Mediante esta iniciativa búscase potenciar a hemodiálise domiciliaria para "facilitar a autonomía dos pacientes co apoio do centro de saúde".

O responsable de Sanidade sinalou que o seu departamento iniciará proximamente a formación dos profesionais para a posta en marcha desta medida que, tal e como subliñou, "non sería posible levar a cabo sen o compromiso, a dedicación e o esforzo incansable do cadro de persoal que traballa neste centro".

O CENTRO DA ESTRADA, DE REFERENCIA

Tamén remarcou que o centro de saúde da Estrada é "o que mellor leva á práctica a filosofía modernizadora" da atención primaria que defende a Xunta, "buscando unha asistencia orientada, non tanto á enfermidade, como á persoa e a súa saúde". Gómez Caamaño lembrou que este centro destaca pola súa "dedicación constante á innovación, á mellora continua e á atención personalizada aos pacientes, converténdose nun referente de boa xestión e práctica clínica".

Tal e como apuntou, o centro é pioneiro na posta en marcha de protocolos de xestión de enfermaría a demanda, onde este persoal se encarga da primeira atención de procesos de baixa complexidade, utilizando protocolos específicos baseados na evidencia científica, "o que permite unha resposta rápida, segura e eficaz ás necesidades dos pacientes".

Tamén forma parte dun ambicioso estudo de investigación en deterioración cognitiva leve e enfermidade de alzheimer, en colaboración co Hospital Clínico de Santiago, no que participan 117 pacientes. Este estudo permitirá avanzar no diagnóstico temperán e mellorar os tratamentos dispoñibles, cun impacto positivo na calidade de vida dos maiores.

Centro de saúde da Estrada | Fonte: Páxinas Galegas