Así sera a caseta de promoción de Galicia en Fitur

Galicia presentará a súa proposta de promoción anual como destino turístico a partir do próximo 22 de xaneiro en Madrid, na Feira Internacional de Turismo (Fitur), cunha aposta por consolidarse como un destino acolledor, auténtico e con proxección internacional. Farao cunha proposta programática na que a xente, o clima, a natureza, a calidade e os recursos culturais adquiren un protagonismo especial na procura de atender a un turista que busca, cada vez máis, "experiencias vitais enriquecedoras", apunta a Xunta.

O espazo institucional recibirá aos visitantes co lema 'Xa estás en Galicia!', que lles dará a benvida a unha comunidade onde a calidade, a biodiversidade e a sustentabilidade serán os eixos dun percorrido polo patrimonio material e inmaterial do destino galego. O expositor, que acollerá a actividade promocional de Galicia ata o 26 de xaneiro, integrará elementos da natureza de costa, do interior e do clima como refuxio, representados pola rica vexetación e a biodiversidade da comunidade. Terán presencia recursos culturais a través do patrimonio material e inmaterial xunto coa herdanza natural milenaria.

Turismo de Galicia contará cunha programación que desenvolverá principalmente os tres primeiros días a feira (do mércores ao venres) enfocados a profesionais, onde se prevén un total de 47 presentacións da Xunta e de distintas entidades. Na fin de semana, Fitur abrirase ao público xeral, e será cando as actividades do expositor se complementen con actuacións e demostracións da cultura e artesanía galega.

REUTILIZACIÓN E REDESEÑO

A Xunta reutiliza, cun novo deseño máis actual e na liña das demandas turísticas do momento, a caseta da pasada edición, que foi galardoada co Premio á 'Mellor Caseta de Fitur 2024', co obxecto de seguir parámetros de sustentabilidade aproveitando materiais e recursos xa dispoñibles. Así, nun espazo de case 1.100 metros cadrados, con máis de 25 metros de pantallas led e apoiado en imaxes gráficas, o espazo transmitirá valores e sensacións que tentarán aproximarse ás emocións que poderán sentir os visitantes se elixen Galicia como destino. Ademais, como cada ano, para favorecer e impulsar os contactos cos empresarios do sector turístico galego, disporase dunha área específica de traballo e punto de encontro para as súas relacións comerciais.

Sustentabilidade, natureza, recursos culturais e calidade centran a caseta de promoción de Galicia en Fitur | Fonte: XUNTA