Estas son as recomendacións de Sanidade para reducir o impacto da onda de frío

A Xunta, a través da Consellería de Sanidade, traslada á poboación recomendacións para reducir ou evitar o impacto negativo das baixas temperaturas no organismo, especialmente, na poboación máis vulnerable, tendo en conta o actual episodio de frío.

Así, e segundo as comunicacións do Ministerio de Sanidade, Galicia atópase en alerta por baixas temperaturas. En concreto, a provincia de Pontevedra está en nivel 3 e a de Ourense en nivel 2. Entre estas recomendacións conséllase empregar roupa lixeira, non apertada e que transpire, empregando varias capas de roupa lixeiras sobrepostas en lugar dunha soa de tecido groso.

Débese prestar especial atención á protección da cabeza, o pescozo, os pés e as mans, porque son as zonas máis sensibles e de maior perda de calor. Empregarase, ademais, roupa de abrigo resistente ao vento e á humidade, e calzado impermeable e antiescorregadizo. Ademais, procurarase permanecer seco, xa que a roupa mollada arrefría o corpo rapidamente.

No caso de ter que realizar un traballo físico baixo o frío, deberá facerse con precaución, suavemente, procurando non esgotarse, especialmente se se sofre algunha doenza de tipo cardiorrespiratorio ou hipertensión. Así mesmo, recoméndase respirar polo nariz e non pola boca, xa que o aire quéntase ao pasar polas fosas nasais, e así diminúe o frío que chega aos pulmóns. Ademais, é conveniente beber líquidos quentes e azucrados, salvo contraindicación médica, e evitar as bebidas alcohólicas.

Dous mozos protexidos do frío con abrigos e gorros | Fonte: Ricardo Rubio - Europa Press