A CIG concéntrase nas sete cidades en contra do "novo recorte na xubilación parcial"

Delegados da CIG concentrouse esta mañá de mércores nas sete cidades en contra do "novo recorte na xubilación parcial", "outro retroceso máis para a clase traballadora". O sindicato nacionalista concentrouse ante a Delegación do Goberno, na Coruña; as subdelegacións do Goberno en Lugo, Ourense e Pontevedra, así como ante as oficinas da Seguridade Social en Santiago, Ferrol e Vigo.

O secretario xeral da CIG, Paulo Carril, tacha de "oscurantista e ilegal" o proceso de negociación desenvolvido no "chamado diálogo social, fóra dos organismos oficiais de representación tripartita, sen respectar os dereitos de representación das centrais sindicais máis representativas e maioritarias, como a CIG". Lamenta que esa negociación levou á firma, o pasado 19 de decembro, do Goberno central, xunto coa patronal, CC.OO. e UGT, do novo acordo de pensións.

Rexeita este acordo mentres non conteña medidas como a recuperación do dereito á xubilación parcial aos 61 anos, para todas as persoas traballadoras e sectores; a xubilación aos 65 anos e voluntaria a partir dos 35 anos cotizados, reais ou por aplicación dos coeficientes reductores, en determinadas profesións; así como o recoñecemento por lei e a mellora dos procedementos para acceder aos coeficientes reductores, para anticipar a xubilación sen recortes e con todos os dereitos.

Concentración da CIG | Fonte: CIG