Dous homes detidos por agresión sexual a unha muller con discapacidade e un terceiro investigado

Dous homes foron detidos pola Garda Civil no municipio lugués de Chantada como presuntos responsables dun delito de abusos sexuais contra unha muller con discapacidade. Segundo trasladaron fontes próximas á investigación, os arrestos producíronse na xornada do luns no propio concello do sur da provincia luguesa. Os dous detidos foron trasladados a depedencias policiais, onde pasaron a noite á espera do seu pase a disposición xudicial, que se producirá na mañá deste martes, como confirmaron fontes xudiciais.

A xuíza encargada do caso ampliou horas máis tarde a investigación a unha terceira persoa e decretou a posta en liberdade dos outros dous detidos por estes feitos, coa obrigatoriedade de presentarse cada quince días ante o xulgado, que impuxo unha orde de afastamento e a prohibición de comunicarse coa vítima, unha muller que padece discapacidade. Ademais, tras solicitar a versión dos detidos, a xuíza citou a declarar a unha terceira persoa, tamén en calidade de investigado por un delito de agresión sexual.