Xesús Palmou deixa a Presidencia da Academia Xacobea

Representantes do mundo institucional, universitario, empresarial e social déronse cita esta tarde no Paraninfo da Universidade de Santiago de Compostela para participar nunha sesión solemne da Academia Xacobea que serviu para abrir de maneira oficial ás actividades do curso 2025 e para formalizar a substitución á fronte da institución de Xesús Palmou, quen foi o seu presidente desde os seus inicios, hai case unha década.

Así o apuntou no seu discurso desta tarde o novo presidente da Academia Xacobea, o catedrático da Filosofía da USC Marcelino Agís Villaverde, quen destacou os "desvelos" e o traballo de Xesús Palmou para pór en marcha a institución "vencendo non poucas dificultades".

Con iso, logrou "conformar un prestixioso corpo de académicas e académicos pertencentes a universidades e institucións científicas de Galicia e de España, e cunha representación doutros países europeos como Francia, Italia e Portugal, nos que o Camiño de Santiago e os temas xacobeos teñen enorme importancia", así como levar a cabo importantes actuacións como a edición do libro Crónica dun peregrino singular ou a organización do primeiro Congreso Mundial Xacobeo, celebrado en Compostela no 2001.

"Sen o bo facer do presidente Xesús Palmou, promotor e cabeza reitora da Academia Xacobea, non conseguiría en tan pouco tempo o recoñecemento público, científico e institucional do que goza nestes momentos", explicou tamén Marcelino Agís, quen foi director de Departamento de Filosofía, decano e vicerreitor de Terceiro Ciclo da USC, e é membro da Academia de Ciencias de Lisboa e da Real Academia de Ciencias Morais e Políticas de España.

Agís sinalou que asume a presidencia con "responsabilidade, gratitude e ilusión", e o convencemento de seguir contando "coa colaboración das institucións públicas, das entidades privadas e das persoas que suman os seus esforzos á organización das nosas actividades".

PRESIDENCIA DE HONRA

Xesús Palmou despediuse da presidencia da Academia Xacobea recibindo o título de Presidente de Honra como recoñecemento ao labor desempeñado durante estes anos e fíxoo agradecendo a "xenerosidade e o afecto" que supoñen ese nomeamento.

Palmou destacou que o traballo levado a cabo nestes anos é "froito dunha tarefa colectiva á que se foron incorporando os distintos Académicos e Académicas de Número que hoxe forman un corpo, un equipo multidisciplinar de Catedráticos, Doutores, Investigadores e expertos "no mundo da peregrinación que, "de maneira altruísta", baixo a dirección do novo presidente, "son a garantía de supervivencia, de continuidade da Academia Xacobea, no seu importante labor científico e divulgativa".