Vilagarcía estrea un novo centro de recepción a "peregrinos náuticos" na Ruta Traslatio
O novo centro contou cun investimento de 790.000 euros de fondos autonómicos.
Por Europa Press / Redacción | Santiago de Compostela | 01/02/2025 | Actualizada ás 18:12
Vilagarcía de Arousa estreou este sábado o seu novo centro de recepción a "peregrinos náuticos" que fan a Ruta Traslatio, a que percorre o traxecto que o mito apostólico atribúe á chegada dos restos de Santiago a Padrón pola desembocadura da ría de Arousa.
A inauguaración do centro contou coa asistencia do presidente da Xunta, Alfonso Rueda, que incidiu no "potencial" do turismo náutico para desestacionalizar a oferta e facer de Galicia "un destino atractivo ao longo de todo o ano", segundo recolle un comunicado.
O novo centro contou cun investimento de 790.000 euros de fondos autonómicos para transformar a antiga estación marítima de pasaxeiros nunha instalación para recibir aos turistas náuticos e promover actividades no mar.
Durante a súa intervención, Rueda destacou as cifras coas que Galicia pechou 2024, no que 8,2 millóns de viaxeiros aloxáronse na comunidade, "moi por encima do cinco millóns rexistrados" en 2019, último exercicio prepandemia.
Tamén resaltou que Galicia rexistrou o maior número de pernoctacións de turistas estranxeiros da súa historia, con "máis de catro millóns en todo o ano", á vez que aumentou o gasto medio realizado un 14,3% respecto de 2023 ata situarse en 170 euros.
Así as cousas, Alfonso Rueda volveu a incidir na idea de que Galicia aínda ten marxe de crecemento a nivel turístico, polo que se comprometeu "a seguir promovendo a chegada de viaxeiros dunha maneira ordenada". "Aquí non nos sobra ninguén. Queremos desestacionalizar o turismo e ofrecer alternativas ao que xa coñecen. E o turismo náutico é bo exemplo", manifestou.
