O presidente da Cámara cae nas inmediacións do Parlamento e causa baixa durante quince días
O médico diagnostica ao presidente da Cámara unha rotura de fibras e prescríbelle repouso durante quince días.
Por E.P. | SANTIAGO DE COMPOSTELA | 28/01/2025 | Actualizada ás 13:49
O presidente do Parlamento galego, Miguel Santalices, ausentouse este martes do pleno e anulou a súa axenda para os próximos días despois de sufrir unha caída nunha rúa das inmediacións do propio Pazo do Hórreo. Na sesión, substitúeo a vicepresidenta primeira, Elena Candia.
Segundo fontes da Presidencia da Cámara, o presidente escorregou pola mañá, antes do arranque do pleno, ao estar mollada a beirarrúa polas abundantes choivas caídas nas últimas horas e días.
Santalices sufriu dano nunha perna e nun primeiro momento puxéronlle xeo. Aínda que se atopa "ben", tal e como trasladan as mesmas fontes, acudiu aos servizos de urxencias e diagnosticáronlle dunha rotura de fibras, polo que lle prescribiron quince días de repouso.
De tal forma, o presidente do Lexislativo galego anulou a súa asistencia á presentación do libro 'Mocidade de Pepa Loba', de Aurelio Miras Azor, prevista para a tarde deste martes en Santiago. Así mesmo, Santalices tampouco participará nunhas xornadas de traballo convocadas para estes xoves e venres na Asemblea de Madrid, coa asistencia de todos os presidentes de parlamentos autonómicos.
