Un home detido por falsear compras con cartóns dixitais prepago para quedar co diñeiro
No momento do pago polo cartón, e cando xa foran xerados os tickets, o detido sacaba o seu telefóno móbil co pretexto de achegalo ao terminal TPV para efectuar a compra
Por E.P. | SANTIAGO DE COMPOSTELA | 13/02/2025 | Actualizada ás 13:47
A Garda Civil detivo a un home de 30 anos acusado de cometer, polo menos, dez estafas en establecementos comerciais de distintos puntos das provincias da Coruña e Pontevedra empregando cartóns dixitais prepagamento coas que falseaba compras para quedar co diñeiro.
O arrestado, veciño de Porto do Son, empregou o mesmo modus operandi en estancos, gasolineiras, librarías e puntos de venda da ONCE das localidades de Marín, Silleda, Caldas de Reis, Vilagarcía de Arousa, Pontecesures, Boiro e Rianxo.
Nestes puntos, segundo explicou a Garda Civil este xoves, solicitaba a adquisición de cartóns 'pay safe', un metodo de pago mediante saldo de entre 50 e 150 euros empregando un código canjeable para compras por Internet.
No momento do pago polo cartón, e cando xa foran xerados os tickets, o detido sacaba o seu telefóno móbil co pretexto de achegalo ao terminal TPV para efectuar a compra.
Desta forma, realizaba unha fotografía dos códigos xerados pero nunca chegaba a facer o desembolso de diñeiro para adquirir o cartón 'pay safe'. Alegaba escusas ante o vendedor e prometía regresar con efectivo, algo que nunca ocorría.
Ao percartarse do ocorrido, os comerciantes trataban de anular a operación pero xa era imposible porque o saldo dos cartóns fora trocado de forma inmediata.
A investigación policial iniciada por mor das denuncias dos responsables dos establecementos estafados permitiu a identificación do suposto autor, un home de 30 anos que conta con numerosos antecedentes por estafas similares e que foi detido o 10 de febreiro.
O xulgado de Primeira Instancia e Instrución Nº 3 de Ribeira, en funcións de garda, instrúe as dilixencias do caso, que non está pechado ante a posibilidade de que existan máis vítimas que aínda non presentasen denuncia.
