Tres anos despois da traxedia do 'Pitanxo', titulados náutico-pesqueiros lamentan que non se tomase "nin unha soa medida"
A Asociación Española de Titulados Náutico-Pesqueiros (Aetinape) pediu máis medidas preventivas e que prevaleza a seguridade dos tripulantes ante a "ansiedade produtiva".
Por Europa Press / Redacción | VIGO | 13/02/2025 | Actualizada ás 14:19
A Asociación Española de Titulados Náutico-Pesqueiros (Aetinape) pediu máis medidas preventivas e que prevaleza a seguridade dos tripulantes ante a "ansiedade produtiva" agora que se cumpren tres anos do afundimento da 'Villa de Pitanxo', que acabou coa vida de 21 dos 24 mariñeiros a bordo. Nun comunicado, Aetinape lamentou que a administración marítima española non tomase "nin unha soa medida" para previr ou mitigar as consecuencias en situacións semellantes que poderían ocorrer.
"Aos tres anos da traxedia constatamos o negro sobre negro: se o accidente foi terrible, tamén terrible é que as autoridades, tras estudar o caso, permanezan inactivas ante as evidencias que mellorarían a seguridade no mar", criticou a asociación, que ve "incrible" que non se tomen medidas para mellorar a seguridade e defender a vida dos mariñeiros. Ao seu xuízo, a primeira desas medidas preventivas debería ser que os buques pesqueiros que faenan en zonas de alto risco, duras condicións climatolóxicas e augas xélidas estean dotados obrigatoriamente de equipamentos tecnolóxicos punteiros, así como botes de rescate insumerxibles, "moito máis eficaces en situacións extremas que as actuais balsas salvavidas".
"Ademais, do mesmo xeito que ocorre noutros países do norte de Europa que xa dispoñen dese tipo de normativa, a partir dunhas determinadas condicións meteorolóxicas (que algúns países establecen de forza 8 sobre 40 ou 45 nós de vento) os buques deben navegar á capa ou arribar ao porto máis próximo. Esta normativa debería tomarse por consenso entre todos os ámbitos da pesca, para combinar as condicións de competitividade entre buques e empresas, coa imprescindible mellora na seguridade das tripulacións", engadiu. Para Aetinape, isto sería "moi importante" para a seguridade xurídica dos mandos do buque, "máis aló da presión que poidan recibir para arriscar ao límite as faenas de pesca, facendo prevalecer en calquera caso a seguridade das tripulacións por enriba da ansiedade produtiva".
"Por outra banda, as tripulacións que faenan nestas augas debería traballar cun traxe de supervivencia que sexa intrinsecamente illante, insumerxible e dotado de baliza persoal de localización, tal e como ocorre cos chalecos salvavidas. Este tipo de indumentaria permite que en caso de caer ao mar, a temperatura do seu corpo non descenda máis de dous graos centígrados tras seis horas na auga", subliñou. Por todo iso, a Asociación pediu á Dirección Xeral da Mariña Mercante que estude estas solicitudes "a efectos de mellorar a seguridade a bordo e equiparar a España cos países máis punteiros nesta materia".
