Protesta dos veterinarios pola normativa actual sobre medicamentos e un decreto obsoleto da Xunta
Concentráronse ante a Subdelegación do Goberno en Pontevedra.
Por Europa Press / Redacción | PONTEVEDRA | 13/02/2025 | Actualizada ás 17:22
Ao redor de medio centenar de veterinarios concentráronse este xoves ante a Subdelegación do Goberno en Pontevedra para trasladar o malestar da profesión coas decisións adoptadas pola Administración "tanto por acción como por omisión" nos últimos anos. O detonante destas protestas foi a entrada en vigor da obrigación de declarar os antibióticos prescritos en animais compañía á base de datos Presvet.
Así mesmo, tamén denuncian "os distintos agravios comparativos" que, aseguran viñeron sufrindo respecto doutros profesionais sanitarios e en comparación cos seus compañeiros do resto de países da Unión Europea. Segundo afirman, esta "discriminación" débese a decisións como as adoptadas pola Axencia Tributaria "por imporlles un IVE do 21%". Tamén sinalan ao Ministerio de Sanidade por non crear prazas de Formación Sanitaria Especializada para veterinarios.
Igualmente, culpan ao Ministerio de Dereitos Sociais e Axenda 2030 pola publicación da Lei 7/2023 sen contar cos veterinarios e ao Ministerio de Agricultura por, entre outros motivos, o adiamento da figura de Veterinario de Explotación e por non poder vender nin medicamentos que non necesitan prescrición veterinaria.
Do mesmo xeito, cargaron contra a Xunta por "manter un decreto de funcións publicado hai 34 anos que non se adapta á situación actual dos veterinarios". Nesta liña, reprochan que Galicia sexa a única Comunidade onde a vacinación contra a rabia non é obrigatoria ou por non dispor de rexistros onde inscribir os establecementos veterinarios.
REUNIÓN CON ABEL LOSADA
Mentres se mantiña a concentración de protesta na rúa, no interior do edificio varios representantes dos veterinarios reuníronse co subdelegado do Goberno en Pontevedra, Abel Losada, que se comprometeu a trasladar estas demandas aos ministerios competentes e agradeceu a cordialidade do encontro, subliñando a importancia do traballo do sector veterinario no ámbito da saúde pública e o benestar animal.
No entanto, os manifestantes tamén presentaron por rexistro un escrito dirixido ao presidente do Goberno, Pedro Sánchez, explicándolle de maneira detallada todas as súas reivindicacións.
