O PSdeG presentará alegacións contra a solicitude de cesión de terreos para a casa da parella de Feijóo

Os socialistas presentarán alegacións contra a solicitude de Eva Cárdenas, parella do líder do PP Alberto Núñez Feijóo, para ampliar ata 2037 a concesión do terreo que dá acceso á praia desde a súa casa en Moaña.

Así o avanzou este venres en rolda de prensa o portavoz da Executiva do PSdeG, Julio Torrado, que sostivo que a petición e a concesión do uso dun espazo de dominio público por 30 anos para unha vivenda de luxo na costa é "un exemplo claro" de como se protexe a uns poucos, mentres miles de galegos e galegas non poden acceder a unha vivenda digna.

"Non imos permitir que o PP converta o litoral galego nunha extensión dos privilexios dos seus dirixentes", afirmou Torrado, que avanzou que os socialistas de Moaña presentarán, nos próximos días, alegacións contra a solicitude de prórroga da cesión.

Ademais, Torrado manifestou a súa sorpresa polo feito de que o Concello concedese unha licenza de obra a unha vivenda que non tiña todos os permisos urbanísticos en regra. "Se cadra, tamén deberían dar explicacións por isto", sostivo nunha rolda de prensa na que asegurou que a "única vivenda" que perece preocupar ao PPdeG é a de Feijóo e Eva Cárdenas.

E é que o socialista considerou que mentres o PP protexe aos seus, "segue ignorando o problema real da vivenda en Galicia". "Os prezos disparáronse e o acceso a un aluguer alcanzable é case imposible", dixo.

Así as cousas, Torrado asegurou que non se pode permitir que as galegas e os galegos queden sen opcións para acceder a un fogar mentres uns poucos seguen acumulando privilexios".

Neste punto, lembrou que a súa formación propón un banco público de aluguer que podería mobilizar ata 5.000 vivendas a prezo alcanzable, garantindo seguridade para propietarios e acceso digno para os inquilinos. "Mentres o PP favorece a especulación, os socialistas propomos solucións reais", afirmou.

O PP CRITICA QUE SE PIDA UN "COMPORTAMENTO DISTINTO" A UNHA CIDADÁ

Pola súa banda, preguntado respecto diso, o portavoz parlamentario do PPdeG, Alberto Pazos, sostivo que lle parece "razoable" que "se os anteriores propietarios da vivenda podían solicitar" esta concesión ela poida facela.

O que, na súa opinión, "non parace razoable" é que se pida un "comportamento distinto" ao novo propietario porque é parella dun cargo do Partido Popular. "Pero que pasa? Que os parentes dos cargos do PP non poden concorrer a licitacións, non poden acceder a postos de traballo e agora tampouco poden facer unha solicitude a un organismo oficial?", censurou.

Alberto Pazos subliñou que é "normal que faga a solicitude" e "extremadamente normal" que ese organismo, se se dan as condicións para atendelas, aténdaas, e que "se non se dan, rexéitea". Pero rexeitou que unha cidadá "non poida facer unha solicitude" ante Costas, organismo "que segue sendo do Goberno do Estado", polo feito de que sexa parella de Feijóo.

"Calquera día vexo á Xunta rexeitando comprar vehículos a Stellantis porque o meu curmán traballa na cadea", ironizou para pedir "un pouco de sentido común".

O portavoz da Executiva do PSdeG, Xullo Torrado, en rolda de prensa. PSDEG | Fonte: Europa Press