O PPdeG acusa ao BNG de boicotear o debate sobre a normalización do galego

O portavoz parlamentario do PPdeG, Alberto Pazos, acusou este venres ao BNG de intentar boicotear a renovación do Plan Xeral de Normalización Lingüística, tras a negativa da formación nacionalista a participar no proceso promovido pola Xunta.

Durante unha rolda de prensa, Pazos cualificou de "penoso espectáculo" a actitude do Bloque Nacionalista Galego en relación co proceso de actualización do plan lingüístico. Segundo explicou, os nacionalistas "botáronse fóra voluntariamente" ao non aceptar que a reforma non se axustase á súa postura.

Ademais, acusou a formación de intentar obstaculizar a primeira reunión do proceso, asegurando que "dous individuos mobilizados polo BNG tentaron incitar a todos os asistentes a abandonar o encontro". Con todo, engadiu, "foron os únicos que se marcharon", xa que o resto dos convocados continuaron a sesión con normalidade.

Pazos tamén se referiu ao pleno do Parlamento, onde denunciou que un grupo de asistentes, "todos convidados polo BNG", interromperon a intervención do conselleiro de Cultura, José López, nun debate sobre a situación do galego. Entre os manifestantes, segundo afirmou, atopábanse membros da formación nacionalista, representantes sindicais e integrantes de organizacións en defensa do idioma.

O portavoz popular sostivo que estas accións "foron planificadas e premeditadas" dentro dunha estratexia do BNG e entidades como A Mesa pola Normalización Lingüística e Queremos Galego para "impoñer a súa visión sobre o galego".

CHAMAMENTO AO CONSENSO

O deputado do PPdeG insistiu en que a lingua galega "é propiedade de todos" e que debe impulsarse desde o "consenso, o diálogo e a vontade de escoita". Por iso, defendeu o proceso iniciado pola Xunta como un paso cara a un pacto social e político para o futuro do idioma.

Por último, Pazos asegurou que estas situacións evidencian unha división interna no BNG, suxerindo que no grupo parlamentario "xa hai quen manda máis que a súa portavoz, Ana Pontón", en referencia ao peso da UPG na toma de decisións sobre o galego.