Por E.P. | SANTIAGO DE COMPOSTELA | 21/02/2025 | Actualizada ás 13:09
O Boletín Oficial da Provincia (BOP) publicou as bases do XVI Premio Rosalía de Castro da Lingua. Trátase dunha iniciativa da Deputación da Coruña destinada a recoñecer iniciativas, traballos recentes e traxectorias de persoas, colectivos ou entidades "comprometidas coa promoción e dignificación social do patrimonio lingüístico" en todo o territorio autonómico.
Segundo informa o organismo provincial, o xurado terá "especialmente en conta a relevancia para o futuro do galego". O prazo de presentación de candidaturas estará aberto ata o 30 de abril.
O certame, engade, repartirá un total de 15.000 euros en premios, 5.000 para cada un dos gañadores das tres categorías do galardón.
Unha modalidade remunerará á persoa que máis destaque na promoción da lingua galega de calidade e cunha identidade propia e unhas características xenuínas para empregala en todos os ambientes e con todos os estratos sociais; outra, á entidade que máis destaque na promoción da lingua galega; e unha terceira, ao proxecto concreto de dinamización lingüística que realice un traballo específico cos tramos da poboación de menor idade, infancia e mocidade e que atenda espazos emerxentes de uso da lingua.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.