Estudantes de Arte Dramática denuncian "coaccións" e "intimidación" dalgúns docentes
Lamentan tamén que trasladaron os feitos á Consellería de Educación en diversas ocasións e non tiveron solución.
Por Europa Press / Redacción | VIGO | 21/02/2025 | Actualizada ás 17:10
Estudantes da Escola de Arte Dramática de Galicia (ESAD) protagonizaron este venres unha protesta no centro, situado en Vigo, para reclamar "solucións" á administración ante a "situación de incomodidade" que se vive nas aulas polas "coaccións", "intimidación" e "prácticas cuestionables" por parte dalgúns docentes. Así, fixeron unha concentración e corearon consignas como "a nosa educación, sen intimidación", "fóra o medo, queremos solucións", ou "non hai comodidade, queremos igualdade", antes de dar lectura a un manifesto co que esixen respostas á administración e "tolerancia cero da Inspección educativa ante prácticas que violentan a intimidade".
Aínda que non quixeron especificar que comportamentos os levaron a amosar a súa desconformidade, si sinalaron que non se senten "seguros" fronte á actitude dalgúns docentes, que lles levan a sentirse "manipulados, aterrorizados, violentados e atacados". "Necesitamos un ambiente seguro, a intimidación e o abuso de poder non deben ter cabida", advertiron. Ademais, denunciaron que trasladaron os feitos á Consellería de Educación en diversas ocasións e non tiveron solución, polo que advirten: "Non quedaremos caladas, permitindo que o ciclo continúe, porque a inacción das institucións perpetúa o problema".
"Esiximos mecanismos de denuncia accesibles, e que protexan ao alumnado", explicaron, antes de apuntar que temen represalias se dan informacións máis concretas, aínda que confirmaron que a situación de malestar está vinculada en certa maneira cos feitos ocorridos hai uns anos no centro, cando varias alumnas interpuxeron denuncia, por suposto acoso sexual, contra tres profesores, un procedemento que foi arquivado. O director da Escola, Roberto Relova, confirmou que a situación de tensión e malestar mantense desde hai meses, e trasladou o seu respaldo aos alumnos e alumnas.
"SOLICITANDO INFORMACIÓN"
Pola súa banda, fontes da Consellería de Educación, Ciencia, Universidades e FP consultadas por Europa Press sinalaron que a Inspección Educativa "está a solicitar información" sobre as denuncias que fan os alumnos da ESAD "para coñecer de modo pormenorizado a situación e, se fose necesario, implementar as medidas que correspondan". De feito, abundaron as mesmas fontes, este mesmo venres "mantivéronse reunións con representantes de alumnos e do claustro".
