Rueda sobre as acusacións de ocultar que os terreos de Altri estaban protexidos: "Non haberá indicio de irregularidades"
Evita profundar sobre a "redución de protección" que denunciou a Sociedade Galega de Historia Natural nos terreos para o proxecto.
Por Europa Press / Redacción | LUGO | 24/02/2025 | Actualizada ás 18:38
O presidente da Xunta, Alfonso Rueda, volveu a remitir aos técnicos para determinar se o proxecto de Altri en Palas de Rei vai para adiante e garantiu que, cando haxa unha decisión, tras avaliar os distintos puntos, "non haberá indicio de irregularidades". Así o manifestou despois de ser preguntado sobre por que, cando a Xunta sacou a exposición pública a Estratexia Galega da Infraestrutura Verde, os terreos para o proxecto de Altri figuraban como protexidos pola figura de "zona de amortiguación" da Rede Natura da Serra do Careón.
Con todo, cando este documento se publicou no Diario Oficial de Galicia (DOG), esa clasificación borrouse, segundo denuncia a Sociedade Galega de Historia Natural (SGHN), que sostén que a Xunta o fai para propiciar unha Declaración de Impacto Ambiental (DIA) favorable a Altri. Rueda evitou profundar na cuestión, sobre a que foi interpelado en dúas ocasións, e defendeu que a Estratexia da Infraestrutura Verde e a declaración de impacto ambiental son "cousas diferentes", á vez que se queixou de que o proxecto da pasteira lusa choca "cada día cunha nova acusación" e suspicacias sobre se os pasos se dan de xeito "torticero". "En todos os casos e todas as circunstancias digo que non. Está a analizarse desde o punto de vista legal e ambiental, e observaranse todos os parámetros. Todo o que se queira mesturar digo que non é certo e remítome ao que finalmente ditaminen os técnicos, no caso de Altri e en calquera outro", defendeu.
"UNHA DENUNCIA DUNHA ENTIDADE CONCRETA"
Ante a insistencia dos medios, Rueda recalcou que se trata "dunha denuncia dunha entidade concreta" e insistiu en que o "resultado final" o será tras "analizar todos os parámetros e todos os condicionantes". "O sentido a favor ou en contra verase despois de avaliar todo iso e podo asegurar que non haberá ningún indicio de irregularidades", resolveu.
