Os perigos do GPS: queda encaixado co seu tráiler nunha pequena rúa de Pontevedra
O condutor portugués foi multado pola Policía Local.
Por Europa Press / Redacción | PONTEVEDRA | 25/02/2025 | Actualizada ás 11:49
Un condutor de orixe portuguesa foi multado pola Policía Local de Pontevedra tras facer caso omiso aos sinais de tráfico e deixar 'encaixado' o tráiler que conducía nunha rúa do centro da cidade.
O incidente tivo lugar minutos despois das 20:00 horas deste luns na rúa García Camba de Pontevedra. O transportista seguiu as indicacións que lle marcaba o seu navegador GPS e dirixiu o seu camión de grandes dimensións polas rúas da Boa Vila ignorando os sinais que prohiben o paso de vehículos de máis de 10 metros de longo e 10 toneladas de peso.
O tráiler, procedente da localidade lusa de Coura, foi avanzando polas estreitas rúas da cidade ata topar coa intersección entre as Rúas Andrés Muruáis e García Camba, un xiro de 90 graos onde quedou atrapado. Durante as limitadas manobras que puido facer este camión, pertenencente a unha empresa portuguesa de loxística, levou por diante un farol da iluminación pública.
Os axentes da Policía Local presentáronse no lugar e paralizaron o vehículo tomándolle os datos ao condutor para a sanción correspondente, incluída a reposición da luminaria. Segundo a información facilitada polo Concello de Pontevedra, a multa cobróuselle no acto, como ordena a lei para condutores estranxeiros que non teñan o seu domicilio habitual en España.
Os policías procederon a derivar o tráfico por outras rúas mentres guiaban ao chofer para que saíse co seu tráiler marcha atrás volvendo por onde viñera. A circulación estivo afectada durante máis dunha hora.
