Convenio entre Deputación da Coruña e a ASFEDRO para mellorar o edificio a comunidade terapéutica "O Confurco"

O presidente da Deputación da Coruña, Valentín González Formoso, e a súa homóloga da Asociación Ferrolá de Drogodependencias (Asfedro), Rosario Alabau, subscribiron un convenio de colaboración polo que a institución provincial destinará case 298.500 euros para financiar as obras de mellora do edificio que acolle a comunidade terapéutica 'O Confurco'.

Esta achega súmase á realizada en 2023 para renovar a cuberta do edificio, segundo explicou tras a firma o presidente provincial que destacou que as obras atenden a unha "antiga demanda e a unha necesidade". "Falamos dun edificio que data dos anos 50 e que necesita unha reforma".

Das mesmas, a presidenta da entidade asegurou que permitirá resolver "problemas moi graves que ten a comunidade", en relación ás instalacións. Así, apuntou que se fará "unha reestruturación" para adaptalas ás novas necesidades. Será a través de dúas fases.

"Persoas con problemas de mobilidade non podían ingresar na comunidade terapéutica e agora si", explicou destacando, ademais, a porcentaxe de "éxito" cos pacientes que tratan.

Pola súa banda, Formoso precisou que, tras a firma, procederase á adxudicación da obra para que unha empresa acometa a reforma interior do edificio. "Ao longo deste ano quedarán terminadas as obras da primeira fase", precisou sobre unhas obras previstas en tres anos.