Ferraz "teledirixe" o XV Congreso do PSdeG di Gonzalo Caballero e cre que "non relanzará ao PSdeG"
O exsecretario xeral do PSdeG di que o XV Congreso "parece un chiste" que se "prorrogue a etapa de retrocesos" de Formoso e Besteiro que levou ao partido a "mínimos históricos"
Por Europa Press / Redacción | SANTIAGO DE COMPOSTELA | 06/03/2025 | Actualizada ás 18:36
O que foi secretario xeral do PSdeG entre 2017 e 2021, Gonzalo Caballero, rexeitou "ser cómplice" dun XV Congreso que considera que será "errado" e "inútil para a esquerda" na medida na que non permitirá "relanzar" á formación.
Nun comunicado remitido aos medios, o socialista vigués sostivo que o XV Congreso vén "teledirigido" por Ferraz, como, ao seu xuízo, evidenciou a portavoz do PSOE, a deputada por Burgos Esther Pena, ao asegurar o día despois das eleccións galegas nas que o PSdeG obtivo "o peor resultado da historia" que Besteiro era "o líder natural do socialismo galego".
Ademais, argumentou que este congreso "será de continuidade da situación agónica" que atravesa o partido despois das sucesivas caídas electorais cultivadas con Valentín González Formoso e José Ramón Gómez Besteiro á fronte do PSdeG.
"Nin novo rumbo, nin novo líder, nin nada novo relevante para endereitar o proxecto", incidiu Gonzalo Caballero, convencido de que "sen cambio" os socialistas "seguirán na irrelevancia".
"Perdemos dúas cidades, unha deputación, cinco deputados no Parlamento de Galicia, catro representantes en Cortes, 160 concelleiros", enumerou para sinalar que "aprobar e prorrogar esa xestión no congreso parece un chiste". "Incrible pero certo", remarcou.
Caballero advertiu que o balance de xestión negativo "non termina nos malos resultados electorais", senón que "continúa co sectarismo da dirección actual que, no canto de construír, resta". Neste punto, lembrou as expulsións en Santiago, en Narón e ao alcalde do Carballiño, entre outras crises locais.
"O CONGRESO DO 10%"
En paralelo, puxo o foco en que este congreso representa a menos do 10% da militancia, tendo en conta que as asembleas locais previas, segundo sinalou, "estiveron desérticas".
"A participación estivo por baixo do 10% da militancia no conxunto do sete cidades galegas", sostivo para asegurar que se trata de algo "nunca visto na historia do PSdeG". "Se este congreso non mobiliza nin ás bases, quen cre neste congreso?"
Por último, mostrouse partidario dun PSdeG "vivo, forte e democrático" para "unha Galicia mellor".
