Bolaños e Sánchez arroupan a Besteiro no XV Congreso do PSdeG

O presidente do Goberno e líder do PSOE, Pedro Sánchez, e o ministro da Presidencia, Xustiza e Relacións coas Cortes, Félix Bolaños, arrouparán esta fin de semana ao secretario xeral dos socialistas galegas, José Ramón Gómez Besteiro, no XV Congreso que o PSdeG celebra en Santiago de Compostela e co que a formación aspira a relanzar o seu proxecto. Os socialistas galegos teñen como obxectivo coller impulso nesta cita, na que se elixirá á nova executiva que acompañará a Besteiro á fronte do PSdeG e aprobarase o relatorio que marcará a folla de ruta do socialismo durante os próximos catro anos, así como as normas internas.

Todo iso despois de que os principais cargos orgánicos e Ferraz mostrasen o seu apoio ao xefe de filas do PSdeG para continuar á fronte da formación e remontar unha época marcada pola perda de apoio electoral nas eleccións autonómicas galegas, conflitos en agrupacións de localidades como Santiago, Narón e O Carballiño, así como polo recente falecemento da alcaldesa de Lugo, Paula Alvarellos. Precisamente, neste contexto, unha das principais incógnitas da cita será o nome da persoa que ocupará a Secretaría de Organización do PSdeG e se Besteiro opta por dar continuidade a Luís Lago Lage ou decide apostar por outro socialista ou outra socialista para desempeñar o cargo.

O secretario xeral do PSOE e presidente do Goberno, Pedro Sánchez (e) e o candidato do PSdeG á Presidencia da Xunta, José Ramón Gómez Besteiro (d), durante o peche da campaña electoral do PSdeG-PSOE, no Pavillón Fontiñas | Fonte: Álvaro Ballesteros - Arquivo

Os actos no marco deste XV Congreso, que ten como lema 'A esquerda que pode', arrincaron na tarde do venres, coa entrega dos Premios Maruja Vázquez de igualdade na Ciudade da Cultura, cos que os socialistas recoñeceron á científica María Mercedes Álvarez Lires, Mari Lires, así como ao Colexio Profesional de Xornalistas de Galicia (CPXG). O evento, ademais, contou cunha homenaxe en recordo a Paula Álvarellos.

DOCUMENTOS

Xa o sábado o conclave empeza coa intervención do ministro da Presidencia, Félix Bolaños, xunto ao secretario xeral do PSdeG, José Ramón Gómez Besteiro. Ao longo desta xornada os socialistas debaterán as emendas que chegan vivas ao Relatorio e redactadas para a cita por un equipo coordinado polo actual portavoz da executiva do PSdeG, Xullo Torrado, así como ao regulamento. Pola tarde, ademais, o XV Congreso Nacional do PSdeG contará como actividade paralela cunha Ágora de Debate Europa, promovido polo Grupo dos Socialistas Demócratas do Parlamento europeo e que se dividirá en tres mesas sobre vivenda, xeopolítica e o idioma galego.

Nelas, ademais do propio Besteiro e do eurodeputado Nicolás González Casares, participarán cargos como o portavoz de Vivenda no Senado, Javier Izquierdo; a secretaria de Política Económica e Transformación Dixital do PSOE, Enma López Araújo, así como o catedrático de Lingüística Xeral na Universidade de Vigo e ex membro do comité de expertos da Carta Europea para as linguas rexionais ou minoritarias do Consello de Europa, Fernando Ramallo, con moderación de González Casares. A cita concluirá na mañá do domingo, cando os socialistas presentarán a súa nova executiva antes de proceder á clausura coa intervención de Besteiro e o líder dos socialista Pedro Sánchez.