Evacuado en helicóptero un home tras pasarlle o tractor por enriba dunha perna en Sobrado
A pesar das contusións e da lesión na perna, permanecía consciente no momento do traslado.
Por Europa Press / Redacción | SANTIAGO DE COMPOSTELA | 13/03/2025 | Actualizada ás 14:20
Un home tivo que ser evacuado en helicóptero este xoves tras sufrir un accidente co seu tractor no municipio coruñés de Sobrado. Segundo informou o 112, o ferido estaba a traballar cun tractor nunha zona de monte en Codesoso. O vehículo pasoulle por enriba dunha perna, deixándoo atrapado. O 112 Galicia tivo constancia do suceso ao redor das 10.00 horas, cando o propio afectado logrou chamar ao número de emerxencias para solicitar axuda. Segundo a información recollida polos xestores, o home atopábase ferido e necesitaba asistencia urxente.
De inmediato, desde a sala de operacións do Centro Integrado de Atención ás Emerxencias informouse o Servizo de Urxencias Sanitarias de Galicia-061, aos Bombeiros de Arzúa, ao GES de Friol-Pas e á Garda Civil. Unha vez liberado, o ferido foi evacuado no helicóptero medicalizado con base en Santiago de Compostela. A pesar das contusións e da lesión na perna, permanecía consciente no momento do traslado.
