Rescatados 19 tripulantes tras arder un palangreiro no Pacífico fronte a Chile
Foron rescatados por un barco portugués.
Por Europa Press / Redacción | SANTIAGO DE COMPOSTELA | 17/03/2025 | Actualizada ás 21:16
Os 19 tripulantes do pesqueiro galego 'Pico Tresmares' foron rescatados sans e salvos tras producirse un incendio no motor do barco que provocou o seu naufraxio no Pacífico Sur. Segundo informa Salvamento Marítimo a Europa Press, o pesqueiro pediu auxilio esta mañá ao centro de coordinación de Madrid cando se atopaba a unhas 1.000 millas ao oeste da Serena, Chile.
Salvamento de Chile encargouse de coordinar o operativo no que se deu aviso a buques na zona, nunha noite de temporal. Así, foi o barco portugués Avo Músico o que rescatou a toda a tripulación cando se atopaba en bo estado xa en balsas salvavidas.
Segundo explica Salvamento Marítimo, o capitán do barco relatou que a orixe do sinistro estivo nun incendio na máquina que se estendeu sen poder controlarse. Os mariñeiros tiveron que evacuar o pesqueiro antes do seu afundimento. Actualmente, Salvamento ten constancia de que a tripulación se atopaba no barco portugués, pero sen coñecemento de cara a que lugar se dirixe.
O 'Pico Tresmares' é un palangreiro de superficie con porto base en Celeiro, municipio de Viveiro. Ten 44,5 metros de eslora, o casco é de aceiro e foi dado de alta en novembro de 2005.
