A Xunta reforza a formación pesqueira con 97 cursos durante 2024

A Consellería do Mar activará ao longo de 2024 un total de 97 cursos de formación orientados á capacitación de profesionais do sector pesqueiro, en colaboración con 17 entidades vinculadas á actividade mariñeira en Galicia. Así o avanzou este sábado o titular do departamento, Alfonso Villares, durante unha visita aos cursos de Patrón Costeiro Polivalente organizados pola Confraría de Pescadores de Burela.

Na súa intervención, o conselleiro destacou que "a aposta pola formación é fundamental para garantir a continuidade e a competitividade do sector", sinalando que estas accións formativas se dirixen tanto a persoas que xa traballan no mar como a aquelas que desexan iniciar unha carreira profesional vinculada ao ámbito pesqueiro.

Villares salientou a colaboración da Consellería con entidades como a propia Confraría de Burela, a Organización de Produtores Pesqueiros Porto de Celeiro (OPP-77) e a OPP-7 de Lugo, que tamén forman parte da rede de formación impulsada este ano.

A Xunta comprometeu un investimento de 11,3 millóns de euros para o funcionamento dos catro centros de formación dependentes da Consellería do Mar: os centros públicos de ensinanza náutico-marítima de Vigo, Ribeira e Ferrol, e o centro de acuicultura na Illa de Arousa.

O conselleiro puxo en valor o labor que estas entidades están a desenvolver para facilitar o relevo xeracional no sector e promover un emprego estable e cualificado no medio mariño. “A profesionalización é clave para afrontar os retos que ten por diante a pesca galega”, asegurou.

Os cursos, que abranguen diferentes especialidades técnicas tanto en ponte como en máquinas, contan cunha elevada participación e están a ser desenvolvidos en distintos puntos do litoral galego, con especial atención ás zonas con maior dependencia da actividade pesqueira.