Altri asegura que o seu proxecto en Palas de Rei non afectará á ría de Arousa nin ao Ulla

A empresa Altri, a través da súa directora de Recursos Humanos e Relacións Institucionais en España, Olga Arias, afirmou que o proxecto que impulsa en Palas de Rei non terá impacto negativo sobre os bancos marisqueiros da ría de Arousa nin sobre o río Ulla, ao que irá canalizado o vertido industrial.

Segundo explicou Arias nun comunicado difundido pola sociedade Greenfiber, participada por Altri e Smarttia(empresa vinculada ao CEO de Greenalia, Manuel García Pardo), o proxecto conta cun investimento de 80 millóns de euros destinados ao sistema de depuración de augas. A responsable de Altri sostén que este sistema será "o máis eficiente e innovador da industria" e permitirá garantir a **calidade das augas sen alterar o equilibrio do Ulla nin o ecosistema mariño da ría".

"O demais son bulos", declarou Arias, en alusión ás críticas que veñen recibindo desde colectivos sociais e medioambientais, que alertan do posible impacto do proxecto sobre o medio e sobre sectores produtivos como o marisqueo.

Desde Greenfiber aseguran que o complexo GAMA (Galician Advanced Manufacturing Area), deseñado para producir fibras téxtiles sostibles a partir de celulosa, será "un dos proxectos máis analizados a nivel ambiental en Galicia e en España", e apuntan que cumpre cos estándares esixidos polas administracións competentes.

Estas declaracións prodúcense días despois da multitudinaria mobilización na Pobra do Caramiñal, onde miles de persoas e embarcacións reclamaron a paralización do proxecto, alegando falta de garantías ambientais e un posible risco para a ría de Arousa.

O proxecto continúa en fase de tramitación, á espera de novas resolucións sobre a avaliación ambiental integrada e a autorización definitiva para a súa implantación. A Xunta de Galicia defendeu tamén en anteriores ocasións a legalidade e rigor do procedemento administrativo seguido ata o momento.