O Goberno impulsa o adestramento en galego da IA estatal ALIA con dous millóns de euros para a USC
A ferramenta busca operar con equidade en todas as linguas oficiais, aínda que recoñécese un desequilibrio nos datos de partida
Por Europa Press / Redacción | SANTIAGO DE COMPOSTELA | 23/03/2025 | Actualizada ás 12:57
O Goberno do Estado destinou dous millóns de euros á Universidade de Santiago de Compostela (USC) para desenvolver recursos lingüísticos en galego dentro do proxecto de Intelixencia Artificial ALIA, que aspira a funcionar en igualdade de condicións en todas as linguas oficiais. Esta ferramenta, presentada en xaneiro polo presidente Pedro Sánchez, está aínda en fase preliminar.
A achega forma parte dun investimento inicial de 7,5 millóns de euros co obxectivo de adestrar o modelo en galego, catalán, éuscaro e valenciano. Así o recolle o Ministerio para a Transformación Dixital e a Función Pública nunha resposta parlamentaria a preguntas do BNG e do Partido Popular.
Segundo os datos facilitados polo Executivo, os fondos repártense entre o Barcelona Supercomputing Center (3 millóns de euros), que coordina o proxecto, e as universidades con experiencia en desenvolvemento lingüístico das súas respectivas comunidades: Universidade do País Vasco (2 millóns), USC (2 millóns) e Universidade de Alacante (0,5 millóns).
En Galicia, esta iniciativa encaixa no proxecto NÓS, centrado no impulso tecnolóxico do galego. O Ministerio sinala que a USC colabora achegando "conxuntos de datos de calidade" para o adestramento do modelo, unha tarefa clave para mellorar o rendemento da IA en galego.
O deputado do BNG, Néstor Rego, preguntou tamén pola capacidade actual da ferramenta en linguas cooficiais. A resposta do Goberno indica que ALIA 40b, o modelo presentado, só pode xerar texto, pero aínda non está preparado para manter conversas ou responder preguntas. Isto prevese en futuras versións.
O propio Ministerio admite que existe un "desequilibrio na dispoñibilidade de datos" segundo o idioma, o que repercute directamente no funcionamento da IA. Por este motivo, están a colaborar con distintas institucións para xerar corpus lingüísticos específicos, co fin de mellorar a equidade lingüística.
As melloras no rendemento lingüístico de ALIA desenvolveranse de forma progresiva durante os anos 2025 e 2026, segundo o calendario establecido. A previsión do Goberno é que esta ferramenta sexa "plenamente operativa" en todas as linguas oficiais, aínda que o proceso dependerá da calidade dos datos dispoñibles.
Este investimento está financiado a través do Plan de Recuperación, Transformación e Resiliencia, no que tamén se inclúen partidas adicionais de 4 millóns de euros en 2023 e 8,4 millóns en 2024 para o BSC. A ferramenta ALIA está dispoñible en aberto, aínda que con rendemento desigual segundo a lingua utilizada.
