Non se poderá pescar polbo en maio e xuño por parada de actividade e veda biolóxica

O Diario Oficial de Galicia (DOG) publica este luns a resolución pola que se aproba o Plan de xestión do polbo para a campaña 2025-2026 e que contempla a ampliación de inactividade para impulsar a recuperación da especie, de modo que se establece unha parada temporal durante o mes de abril, e veda biolóxica para os meses de maio e xuño. O plan afecta as embarcacións de artes menores na modalidade de nasa e liña ou cordel (variante 'a rañeira') e, durante os tres meses de parada e veda, queda expresamente prohibida a captura de polbo, tenencia a bordo, transbordo, desembarco, almacenamento, venda e comercialización. As medidas aplícanse tamén á pesca deportiva e de recreo.

No plan recóllese igualmente o número de nasas segundo as zonas de traballo e o tipo de embarcación. Así, na denominada zona A (A Guarda-Pedra do Sal, Caión) os barcos de tipo I e II poderán calar un máximo de 200 nasas por tripulante (máximo 300 nasas por embarcación) e no resto de embarcacións establécese un máximo de 200 nasas por tripulante e un máximo de 600 nasas por embarcación).

Na zona B (Pedra do Sal-Illa de San Vicente), o máximo de nasas por tripulante tamén é de 200, cun máximo de 300 nasas por embarcación de tipo I e II, e de 550 nasas por embarcación dos tipos IV a VII. Na zona C (Illa de San Vicente-río Eo), as embarcacións de tipo I e II poderán calar un máximo de 175 nasas, e o resto, un máximo de 250 nasas por embarcación, máis outras 50 nasas por tripulante, ata un máximo de 550.

Por outra banda, e en canto ás capturas, establécese, entre o 1 de xullo e o 31 de agosto de 2025, un máximo de 35 quilos por embarcación e día, máis 35 quilos por tripulante e día (ata un máximo de 240 quilos de polbo por día). No resto da campaña poderán capturarse un máximo de 55 quilos por barco e día, máis outros 55 quilos por tripulante e día, ata un máximo de 380 quilos diarios. Fíxase tamén como horario de traballo o comprendido entre as 6.00 e as 16.00 horas, aínda que os barcos poderán saír de porto ás 5.00 horas; e establécese o réxime de calado das nasas e as zonas onde estas deben ser retiradas a diario, así como os portos autorizados para a descarga do polbo.

AUTORIZADA A PESCA DE ANGUÍA EN VIGO E AROUSA ENTRE ABRIL E SETEMBRO

Por outra banda, o Diario Oficial de Galicia (DOG) publica este luns as resolucións polas que se autorizan os plans de pesca de anguía para as confrarías de pescadores de Vigo e de Arousa, e que establecen como período de actividade o comprendido entre o 1 de abril e o 30 de setembro. Os plans establecen, en ambos os casos, que só poden participar as embarcacións que teñan permisos de explotación nos que estean autorizadas as nasas para anguía, que só poden empregarse de día, ou as chamadas nasas de 'voitirón', que poden ser utilizadas de día ou de noite. O período de actividade iníciase os luns ás 12.00 horas e as nasas non poden permanecer caladas desde as 12.00 horas dos sábados.

Ningunha embarcación poderá empregar máis de 80 nasas ao día, independentemente da modalidade e da zona de pesca. No caso das confrarías da ría de Vigo, establécense dúas zonas de pesca: a zona delimitada entre a liña de referencia de Punta do Cabo e Punta do Pereiro ata a liña de referencia de limitación de augas continentais, de Punta Muxeira a Punta Ulló), para traballar entre o 1 de abril e o 28 de xuño. A segunda zona é a totalidade da enseada de San Simón, para o período do 30 de xuño ao 30 de setembro.

Para as confrarías de Arousa, a zona de pesca é a totalidade da ría, nas zonas autorizadas. Por outra banda, establécense tamén outras condicións, como a prohibición de que as nasas de 'voitirón' queden 'en seco', a obrigación de valizar correctamente as nasas, a prohibición de capturar anguía prateadas ou a obrigación das confrarías de remitir cada mes os datos de extracción, indicando a procedencia, ao servizo de Pesca da Dirección Xeral de Pesca, Acuicultura e Innovación Tecnolóxica.