Os propietarios da mina de Touro afrontan dous anos de prisión
Así o asegura Ecoloxistas en Acción tras recibir unha notificación do Ministerio Fiscal e demanda inhabilitación especial á propietaria da mina de Touro. Rueda di que o proxecto "será examinado independientemente" de quen sexan os seus promotores.
Por Galicia Confidencial | Compostela | 31/03/2025 | Actualizada ás 14:42
A Fiscalía ven de notificar a Ecoloxistas en Acción que vai solicitar a imposición de penas de 2 anos de cárcere e inhabilitación especial para o exercicio de calquera actividade relacionada con actividades mineiras e extractivas aos propietarios e administradores da mina de Touro por presuntos delitos contra o medio ambiente. Delitos consistentes nas verteduras con altas concentracións de metais pesados realizadas desde a explotación mineira. A Fiscalía tamén demanda a imposición de multas por valor 47.000 euros, ao entender que a póliza de seguros da mina só cubre a responsabilidade civil por contaminación súbita e accidental e non por actividades ilegais.
A solicitude da Fiscalía prodúcese logo de seis anos de instrucción por parte do Xulgado de Arzúa e como paso previo á apertura de xuízo oral. Ao longo da investigación, iniciada tras unha denuncia da organización ecoloxista polas verteduras da mina ao río Barral, tributario indirecto do río Ulla,acumuláronse as probas contra a mineira de Touro, incluíndo numerosos informes e atestados da policía xudicial e dicatames periciais. Isto levou á Fiscalía a concluír que os acusados non tomaron ningunha medida correctora que evitara os lixiviados de extrema acidez e altos contidos en metais pesados.
Desde Ecoloxistas en Acción, personada na causa penal como acusación popular ambiental, denuncian que a contaminación desde a mina de Touro é continua, sen que as numerosas sancións impostas desde Augas de Galicia, sempre de cuantías mínimas, tiveran efecto algún. “A solicitude de penas de cárcere por parte da Fiscalía evidencia a gravidade e intencionalidade da contaminación causada pola mineria e dá unha idea da catástrofe ambiental que suporía confiar a unha empresa con estes antecedentes un novo proxecto de magnitudes xigantescas”, afirma Cristóbal López, voceiro de Ecoloxistas en Acción.
PROXECTO INDUSTRIAL ESTRATÉXICO A MINA DE TOURO
Pola súa parte, a Plataforma Veciñal Mina Touro-O Pino Non solicitará á Xunta que retire a condición de “proxecto industrial estratéxico” á mina de Touro, distinción concedida a comezos do ano pasado que permite unha tramitación acelerada, e que arquive o procedemento de aprobación do novo proxecto, ao constatarse a incapacidade técnica e neglixencia da empresa promotora. De feito, Ecoloxistas en Acción xa recorreu ante o Tribunal Superior de Xustiza de Galiza esta decisión de proxecto estratéxico da Xunta.
“Non é posible confiar o futuro de todo o sistema fluvial do Ulla, da ría de Arousa, do Camiño de Santiago e dunha comarca recoñecida internacionalmente polos seus produtos agrogandeiros de alta calidade nunha empresa á que está a piques de abrírselle xuízo por delitos ambientais e en directivos para os que a Fiscalía pide penas de cárcere”, advirte Isabel García, voceira da plataforma veciñal Mina Touro-O Pino Non.
COBRE SAN RAFAEL DESVINCÚLASE
Nun comunicado, Cobre San Rafael desvincúlase deste asunto porque a denuncia "está referida a Explotacións Galegas" e esta última "só achega" os terreos e a explotación do cobre, mentres que Atalaia Mining é a compañía que ten "capacidade técnica e financeira para desenvolver o proxecto". Ademais, asegura que, se o proxecto da mina se pon en marcha, será Atalaia Mining a que adquira "a maioría do accionariado de Cobre San Rafael".
Esta empresa tamén insiste en que os feitos aos que se refire Fiscalía ocorreron entre 2019 e 2021, polo que "son previos" aos proxectos de drenaxe e canalización, e a nova planta de tratamento de augas financiadas por Cobre San Rafael, que de feito --engade-- inclúe no seu novo proxecto "a restauración integral da totalidade dos terreos da mina histórica, sexan ou non parte da operación" que promoverá.
RUEDA DI QUE O PROXECTO SEGUIRÁ SENDO EXAMINADO
"Pouco podo dicir desa providencia que non coñezo", dixo o presidente galego, Alfonso Rueda, preguntado sobre esta cuestión. Tras a rolda de prensa posterior ao Consello da Xunta, o presidente galego insistiu en que este proxecto "será examinado independientemente" de quen sexan os seus promotores. É dicir, será examinado, en función de se supón un proxecto estratéxico para Galicia.
