Así quere calar as protestas Altri: rodear a macrocelulosa con especies autóctonas e endémicas da zona que afectará
Anuncia a creación dun "cinto verde" para tapar as grandes chemineas da celulosa con carballos, castiñeiros, bidueiros ou acivros e cunha área de especies protexidas e endémicas da zona.
Por Galicia Confidencial | Palas de Rei | 03/04/2025 | Actualizada ás 12:54
Un "cinto verde" con especies autóctonas. Así quere camuflar a multinacional Altri o gran impacto que terán as grandes chemineas da súa macrocelulosa no tratamento de miles de toneladas de eucalipto. "Co obxectivo de minimizar o impacto visual do proxecto GAMA na súa contorna, desenvolveremos un minucioso proxecto paisaxístico nun total de 99 hectáreas", asegura a empresa.
Ese case un cento de hectáreas supoñen pouco máis do 25% do total de 366 hectáreas que prevé ocupar a fábrica en Palas de Rei. "A intervención nesta superficie contempla non só un cinto perimetral de especies autóctonas, senón unha serie de áreas de compensación para protexer e favorecer o crecemento de especies endémicas protexidas, ademais dunha zona tampón con respecto á CEC Serra do Careón", suliña a empresa nun comunicado.
Este "cinto verde" terá unha anchura media de entre 20 e 30 metros, que poderá chegar ao 200 metros nas zonas próximas ás áreas como a ZEC Serra do Careón ou a Lagoa de Quintas. "Este anel permitirá a funcionalidade como zona refuxio e corredor ecolóxico", insiste a empresa que repoboará a zona con especies autótconas como elemento de "amortiguación co medio natural circundante, integrar paisaxísticamente as edificacións da industria, preservar os valores culturais da zona como o Camiño de Santiago, e protexer os valores naturais como flora protexida, hábitats de interese e espazos naturais de interese local".
ESPECIES ENDÉMICAS
O carballo, o castiñeiro, o bidueiro ou o acivro serán a especies autóctonas utilizadas. A multinacional tamén di que haberá unha área de especies prtoexidas e endémicas e un seguimento anual destas poboacións, entre elas, o Santolina melidensis, Leucanthemum gallaecicum e Armeria merinoi para avaliar o estado de saúde das diferentes zonas, a evolución, taxa de crecemento e reprodución.
Así mesmo, anuncia unha retirada selectiva da terra vexetal en todas as superficies directamente afectadas as obras, antes de que se produza o movemento de terras, "co fin de conservar e manter vivo o chan serpentínico para o seu posterior reextensión sobre os terreos afectados, de modo que se poida buscar a implantación das especies endémicas tamén nesas zonas".
