As contas de La Voz de Galicia
Gran redución da débeda, caída dos ingresos do papel, aumento de beneficios da empresa, importantes remuneracións dos directivos e continuación da “minoración salarial” en 2016. Estes son algúns dos aspectos máis importantes das contas oficiais do diario de Santiago Rey.
Por M.V. | Santiago de Compostela | 02/09/2016 | Actualizada ás 08:00
La Voz de Galicia viviu en 2015 un ano positivo, segundo as contas depositadas pola empresa no Rexistro Mercantil. O xornal de Santiago Rey declara un relevante aumento do beneficio e unha importantísima redución da súa débeda.
Así, di que obtivo un beneficio dun chisco máis do millón de euros, unha vez pagado o imposto de sociedades. En 2014 declarara un beneficio de 862.000 euros.
Con todo, o máis relevante é a gran redución do pasivo. Nun só exercicio, a débeda pasou de 7,3 millóns a só 1,5. La Voz de Galicia logrou devolver en 2015 a entidades de crédito máis de 4,6 millóns de euros que debía a curto prazo.
Situación saneada
La Voz seguen tendo pendente préstamos e polizas de crédito a curto prazo por uns 1,5 millóns. Trátase dunha cifra non preocupante, dado o nivel de facturación do grupo, cunha cifra de negocios superior aos 50 millóns de ano. A diferencia da práctica totalidade da competencia na prensa escrita do país, La Voz non presenta débedas relevantes con facenda, as administracións públicas ou os seus operarios.
O problema do papel
Malia este aumento dos beneficios e a amortización da débeda, as contas reflicten unha caída das ventas, que pasan dos 29,7 aos 28,1 millóns. Isto é debido sobre todo “ao descenso dos ingresos da venta de exemplares na edición impresa”, que en 2015 foron de 25,6 millóns fonte aos 26,5 do ano pasado. É dicir, unha caída de ingresos importantes a causa da continúa crise do formato en papel, de case un millón nun só ano.
Sube a publicidade dixital
La Voz logrou compensar este retroceso cun “importante crecemento” da venda de publicidade, cuxa facturación anual aumentou un 3,7%. En realidade o avance foi dende 21 millóns a 21,8 millóns. Este tímido repunte publicitario dáse “tanto na edición impresa e en especial na edición dixital”. É dicir, pódese estimar que a publicidade en lavoz.es está a paliar en parte a caída das ventas do xornal en papel.
Máis clientes, e beneficios, para a imprenta
Outros factores que a propia compañía recoñece como relevantes para explicar a suba de beneficios son o acordo que está a limitar os salarios do cadro de persoal e os dividendos procedentes de Galicia Editorial SL.
Galicia Editorial SL é a imprenta de La Voz de Galicia. Modernizouna en 2010 grazas, en parte, a subvención a fondo perdido da Xunta por valor de 2,2 millóns de euros. Isto permitiulle nos últimos anos facer novos traballos. Entre outros, comezar a imprimir todos os xornais de Editorial La Capital (El Ideal Gallego, Diario de Arousa, DxT, Diario de Bergatiños, Diario de Ferrol) que se desprendeu da súa imprenta.
Para avaliar a importancia da imprenta na Voz, cómpre ter en conta que dos 1,2 millóns de beneficio antes de impostos; 857.000 euros proveñen dos dividendos da imprenta e menos da metade, 406.000, do resultado de explotación do propio xornal.
Remuneracións dos directivos
Os beneficios destes dous últimos anos permitiron ao Consello de Administración repartirse 344.000 e 331.000 euros respectivamente en remuneracións. Deses cartos, 190.000 e 133.000, respectivamente, son salarios.
O Consello está formado por cinco persoas (o editor, presidente e propietario Santiago Rey; o director xeral da Corporación Voz Lois Blanco; o letrado e profesor da UDC Manuel Areán; o empresario ex-de Arthur Andersen, Banco Pastor e Inditex José Luís Vázquez Mariño e o conselleiro de Adolfo Domínguez e o profesor da Universidad de Navarra José Luís Nueno). Polo tanto, salarios a parte, a cúpula repartiuse dos beneficios máis de 30.000 euros por cabeza en 2015 e case 40.000 o exercicio anterior.
La Voz de Galicia SA forma parte da Corporación Voz de Galicia, empresa cabeceira do grupo da que tamén dependen a radio e a televisión da Voz. Algúns dos directivos de La Voz tamén poden ser directivos da Corporación, polo que os seus soldos globais poden ser maiores.
Os recurtes nos salarios seguirán en 2016
O outro factor clave son os recortes aplicados ao cadro de traballadores, que a empresa denomina “política de contención e racionalización de gastos”. A “minoración salarial” pactada a finais de 2014 seguirá vixente en 2016. A empresa asegura que este recurte está compensado pola paga de beneficios, que este ano será superior ao anterior. O cadro de persoal está formado por unhas 316 persoas.
