Todas as enquisas apuntan a unha nova maioría absoluta de Feijóo, a unha semana das eleccións

Todas as enquisas coinciden en outorgarlle a Alberto Núñez Feijóo a súa terceira maioría absoluta no Parlamento galego. A día de hoxe, ningunha sondaxe contempla a posibilidade dun goberno alternativo e as incógnitas, coas enquisas comparadas, son: a contundencia coa que gañarían os populares e, polo tanto, o grao de absolutismo co que volverían gobernar; se En Marea finalmente superará o PSdeG, ou se os socialistas resistitán como segunda forza; se o BNG poderá frear o seu declive e salvar os mobles como cuarta forza política e con grupo propio, e se Ciudadanos logrará entrar no Parlamento galego.

O que non cuestiona ningunha enquisa é que o PPdeG gañaría de novo de maneira esmagadora. Segundo varias sondaxes publicas hoxes, o Partido Popular de Alberto Núñez Feijóo revalidaría a maioría absoluta; En Marea, capitaneada polo maxistrado Luís Villares, pasaría ao PSdeG de Xoaquín Fernández Leiceaga e consolidaríase como segunda forza no Pazo do Hórreo; o BNG, encabezado por Ana Pontón, non lograría grupo parlamentario propio na Cámara galega (o mínimo de escanos son 5); e Ciudadanos móvese entre obter un par de escanos ou non conseguir ningún.

PP: ENTRE 38 E 44 ESCANOS

As enquisas publicadas este domingo en varios xornais galegos e estatais outorgan ao Partido Popular de Galicia entre unha vitoria xusta, con 38 escanos (o límite da maioría absoluta) e un triunfo esmagador, con 44 deputados (tres máis que os que obtivo nas últimas eleccións). Entre as sondaxes que lle conceden unha vitoria máis estreita atópase a de Sondaxe para 'La Voz de Galicia' —38 deputados-—, a de Celeste-TEL para o diario.es —entre 38 e 40—, a de Einvenio para 'Faro de Vigo' e 'La Opinión de A Coruña' —entre 38 e 39— e a de Sigma Dos para 'El Mundo' —entre 38 e 41—.

Pola súa banda, as enquisas de GAD3 para 'ABC' e de Metroscopia para 'El País' outorgan ao PP unha maioría absoluta algo máis ampla, nunha pinza de entre 39 e 41 deputados. A sondaxe de NC Report publicada no xornal 'La Razón' concédelle aos populares un escano máis: entre 40 e 41.

Pero de todas, a enquisa que lle concede unha maioría moito máis folgada ao Partido Popular é a de Infortécnica, publicada en 'La Región' e 'Atlántico Diario', que lle dá aos conservadores: entre 42 e 48 escanos, facendo unha media de 44 (actualmente, o PP conta con 41 escanos).

EN MAREA VS PSdeG

Todas as sondaxes, agás dúas —as de 'La Región' e 'ABC'— sitúan a En Marea como segunda forza, pasando deste xeito ao PSdeG, que deixaría de liderar a esquerda galega (actualmente conta con 18 escanos). A enquisa de 'La Voz de Galicia' é a que máis escanos lle concede á formación de Luís Villares, cun total de 20 escanos para En Marea e tan só 13 para o PSdeG, seguida polas sondaxes de 'Faro de Vigo', 'La Razón', 'El País' e 'El Mundo', que lle outorgan a En Marea, se se colle a cifra máis baixa e a máis alta, entre 16 e 18 deputados.

Con todo, as enquisas de 'La Región' e 'ABC' manteñen o PSdeG en segundo lugar, con 15 e entre 16 e 17 deputados, respectivamente. De feito, nestas sondaxes, En Marea só acada 13 e entre 14 e 16 escanos. Podería haber, pois, un empate técnico entre ambas as dúas forzas.

AS INCÓGNITAS DO BNG E DE CIUDADANOS

Outra das incógnitas que arroxan estas enquisas é se o BNG manterá ou non o seu grupo parlamentario no Pazo do Hórreo, sendo a sondaxe publicada en 'El Mundo' a único que lle concede esa posibilidade, con entre catro e seis deputados. Pola súa banda, o resto das enquisas outórganlle entre dous e catro escanos, insuficientes para formar grupo parlamentario propio.

Tamén é outra incógnita se Ciudadanos conseguirá representación parlamentaria por primeira vez en Galicia. A enquisa máis positiva para a formación laranxa é a publicada en 'Faro de Vigo', que lle dá entre dous e tres deputados, que non lle valerían de nada se se cumpren os prognósticos da maioría absoluta para Feijóo. Pola súa banda, a sondaxe de 'La Voz de Galicia' e a de 'La Región' lle outorgan un escano, mentres que o resto de enquisas se moven entre cero e dous.