A Xunta traballa nunha fusión das caixas galegas

E a posibilidade de fusións non só é exclusiva de Galicia. En Cataluña, Caixa Catalunya, Caixa Girona e Caixa Tarragona barallan esta posibilidade dende hai tempo e en Castela e León xa tomaron o mesmo camiño Caja Duero, Caja España e Caja Burgos.

A peculiaridade do caso galego é a tutelaxe que o poder político está a exercer nesta futura operación.Nos últimos días, o presidente galego, Alberto Núñez Feijóo, que fai unhas semanas amosabase moi prudente, insistiu nos beneficios dunha futura fusión e fixo especial fincapé na necesidade de unidade das caixas galegas para facer fronte a crises e a outras operacións financieiras. Facía referencia a posibilidade de que sexa o Banco de España quen interveña para impoñer fusións e evitar as situacións delicadas que atravesan algunhas caixas.

Segundo informacións de Caixanova chegadas a GC, os principais dirixentes da Xunta, con Núñez Feijóo á cabeza, teñen abordado a cuestión co presidente de Caixanova, Julio Fernández Gayoso, e o director xeral de Caixa Galicia, José Luis Méndez. A caixa coruñesa ve con moi bos ollos a fusión pero hai reticencia no caso da gran caixa do Sur. Os principais problemas están nos reaxustes que hai que facer; sedes sociais e reaxuste de altos cargos. Precisamente, é nesta última cuestión, onde se presentan novos atrancos, sobre todo, sobre o futuro de Gayoso na nova corporación. Por iso, as súas reticencias a unha fusión xa que conlevaría un cambio da súa actual posición e unha perda de influencia de Caixanova na futura caixa.

Unhas reticencias que se basean no contido das conversas iniciais, xa que hai informes sobre a división do entramado económico da nova entidade que deixaría a Coruña como centro económico; Vigo como sede da corporación industrial e Santiago, da obra social.

Outro recente estudio do Banco Santander xa aportaba datos sobre unha hipotética fusión das dúas caixas e as súas conclusións son elocuentes. A nova entidade revalorizariase entre un 30 e un 50% e valería uns 5.200 millóns de euros, cunha cota de mercado español do 3,4% e do galego do 35%.  Datos que, con outros de índole interna, teñen manexado na Xunta para animar aos principais protagonistas desta fusión a decidirse.

Nos vindeiros días haberá movementos importantes. As conversas entre caixas e Xunta continuarán e xa están sendo informados os grandes empresarios para tentar respaldar esta operación.