A primeira convocatoria de axudas para promover o uso da IA en empresas aprobarase no próximo Consello da Xunta

A conselleira de Economía e Industria, María Jesús Lorenzana, anunciou este sábado que o próximo Consello da Xunta aprobará a primeira convocatoria de axudas en Galicia para promover o uso da intelixencia artificial (IA). Durante unha visita ás instalacións de Pontevedresa Group, explicou que se trata dunha liña de axudas por valor de 10,3 millóns de euros que implica unha aposta para que as pequenas e medianas empresas non tecnolóxicas "poidan contratar servizos doutras compañías que incorporen a intelixencia artificial nos seus procesos produtivos". Segundo detallou a Xunta nunha nota de prensa, o obxectivo é que as empresas "melloren" tanto a súa eficiencia como a súa competitividade.

Ademais, lembrou que, por primeira vez, o Instituto Económico de Galicia (Igape) conta cunha área específica de innovación empresarial desde o que se vai a xestionar esta nova liña de subvencións. "É un orgullo enorme ter empresas familiares en Galicia como esta: máis de 60 anos de tradición familiar, de esforzo, de talento e de intelixencia para converterse nunha fábrica que é líder no sur de Europa no tipo de vidro que fabrica", sinalou a conselleira. En concreto, Pontevedresa Group é o fabricante independente "máis antigo" de España no sector nacional do vidro e acumula un "gran esforzo investidor" tanto na planta que visitou a representante autonómica como na que posúe no parque empresarial do Campiño (Pontevedra).