Así serán os servizos mínimos da folga de empresas de mantemento de hospitais na área da Coruña-Cee

A Consellería de Sanidade publicou no Diario Oficial de Galicia (DOG) os servizos mínimos pola folga convocada por persoal da empresa que presta servizos de mantemento dos hospitais do Sergas na área da Coruña-Cee.

Segundo recolle o DOG, os representantes do persoal da empresa Veolia Servizos Norte, que presta servizos de mantemento en instalacións hospitalarias, convocou folga para os días 23, 24, 30 e 31. Por iso, especifica a necesidade de presenza de persoal en domingo ou festivo e sinala que a determinación dos traballadores necesarios "realizarase pola empresa en coordinación coa dirección da área de saúde da Coruña e Cee".

Entre outras cuestións, alude, en canto aos criterios a ter en conta, ao risco para os pacientes, os usuarios e traballadores, o impacto na actividade asistencial e o volume de poboación atendida.

Concentración de traballadores do complexo hospitalario universitario da Coruña (Chuac) | Fonte: CIG