A científica da Misión Biolóxica de Galicia Carmen Martínez, na Selección Española da Ciencia 2016

A directora do Grupo de Viticultura da Misión Biolóxica de Galicia-CSIC, Carmen Martínez, foi elixida para formar parte da Selección Española da Ciencia 2016 xunto a prestixiosos investigadores de diferentes áreas de coñecemento, o que a converte na primeira investigadora do sector agrario que recibe este recoñecemento.

Carmen Martínez foi seleccionado pola súa pioneira labor de investigación na recuperación de variedades autóctonas de vide, no estudo da sensibilidade a enfermidades fúngicas, no comportamento en campo das plantas de vide multiplicadas por cultivo in vitro e do aproveitamento e posta en valor dos residuos vitivinícolas.

O CSIC (Consejo Superior de Investigaciones Científicas) destaca que nos seus trinta anos de traxectoria profesional, Carmen Martínez "contribuíu a impulsar o sector vitivinícola dende o ámbito científico localizando, describindo e recuperando variedades de uva descoñecidas e en vías de extinción".

Así mesmo, tamén realizou estudos sobre a sensibilidade a enfermidades fúngicas das distintas viníferas e os seus mecanismos de defensa fronte a estes patóxenos, o comportamento en campo das plantas de vide obtidas mediante multiplicación in vitro ou o aproveitamento e posta en valor dos residuos vitivinícolas.

Carmen Martínez foi "pioneira na utilización de técnicas de ADN para a descrición de variedades autóctonas" e na selección de clons, como é o caso do Albariño. "Hoxe en día todo o mundo coñece o Albariño, pero cando comecei, en 1986, foi necesario recuperar os vellos exemplares que quedaban illados e dispersos por toda a xeografía galega, describir a variedade botanicamente e agronomicamente e realizar estudos sobre o seu nivel de resistencia ás distintas enfermidades que a atacan", explicou a investigadora.

Para a súa elección como membro da Selección Española da Ciencia 2016 pola recoñecida revista QUO tamén foi fundamental o papel da doutora Martínez na recuperación da "viticultura heroica" en Asturias, tras desenvolver un completo traballo de I+D+i.

Neste recoñecemento obtido pola científica tivo tamén especial importancia o seu estudo sobre as follas de vide e acios representados nos retablos barrocos de Galicia e Asturias, que permitiu determinar ao seu equipo a antigüidade do cultivo dalgunhas das principais variedades de vide en ambas as dúas comunidades autónomas.