A Xunta di que os bancos están na “obriga moral e legal” de pagar as cláusulas solo

A Xunta saíu en defensa dos afectados polas cláusulas solo aos que o Tribunal de Xustiza da Unión Europea acaba de recoñecer que teñen que recibir o cobrado de xeito irregular polas entidades bancarias desde o inicio deste tipo de produtos bancarios. “os bancos están na obriga legal e moral de subsanar isto”, suliñou este xoves o presidente da Xunta, Alberto Núñez Feijóo.

Afectados pola cláusula chan protestan en Vigo | Fonte: Europa Press.

Na rolda de prensa posterior ao Consello da Xunta, Feijóo foi moi crítico con este tipo de práctica. Unhas críticas que chegan logo da sentenza do tribunal da UE. Por iso, suliñou que as sentenzas xudiciais están para “ser cumpridas” e agarda que os bancos a executen “de oficio”.

En todo caso, advertiu que se non o fan de motu propio, a Xunta porá en marcha distintas iniciativas para axudar aos galegos afectados. Entre as medidas que anunciou están a realización de xornadas explicativas nas grandes cidades galegas, así como poñer a disposición dos afectados os servizos do Instituto Galego de Consumo para que poidan ser asesorados, ben presencialmente ou a través da web.

Segundo estimacións de reclamador.es, compañía online que se di líder en reclamacións en España, o número de españois afectados cífrase ao redor dos tres millóns e medio, dos cales, 205.000 son galegos.  Segundo os cálculos desta web, de media, en base ás reclamacións dos seus clientes, os afectados poderán recuperar uns 8.000 euros de indemnización e ademais verán reducida a súa débeda co banco.

Este xoves tamén a asociación de consumidores Acouga estimaba en máis de 77.000 os clientes de Abanca con claúsulas solo ao longo de todo o Estado.