Cal será o papel de Anova dentro de En Marea?
A formación fundada por Xosé Manoel Beiras debaterá o seu papel dentro de En Marea nunha asemblea que terá lugar a "finais de xaneiro ou febreiro".
Por E.P. | SANTIAGO DE COMPOSTELA | 11/01/2017 | Actualizada ás 15:34
Anova tamén analizará o seu papel dentro de En Marea nunha Asemblea Nacional que terá lugar a "finais de xaneiro ou febreiro". Neste cónclave tamén se renovarán os seus documentos políticos, así como ás persoas que ocupan os cargos organizativos na coordinadora e a permanente.
Así o sinalou o coordinador da organización nacionalista, Antón Sánchez, ao ser preguntado ao respecto durante unha rolda de prensa na que compareceu acompañado por a tamén militante de Anova, Alexandra Fernández, co obxectivo de presentar propostas en materia do Imposto de Bens e Inmobles (IBI) que En Marea levará ao Parlamento e ao Congreso.
Neste escenario, Antón Sánchez recordou que o pasado mes de decembro Anova xa celebrou a súa Conferencia Política na que fixo unha "reflexión xeral" sobre as cuestións que teñen que mellorar e tamén sobre a relación co espazo político de En Marea.
"Agora o que vai haber é un proceso nas asembleas locais e territoriais, concretando máis esa reflexión xeral", explicou para indicar que iso dará lugar á Asemblea Nacional que, "como moi tarde", se debe celebrar entre "finais de xaneiro e febreiro".
Pola súa parte, a deputada de En Marea no Congreso e militante da formación nacionalista asegurou que toca "debater o papel que ten Anova dentro de En Marea. "Creo que é evidente que Anova é unha peza fundamental dentro de En Marea polo capital político e humano que achega", sinalou para deixar claro que "sempre" apostaron pola confluencia.
