Críticos coa dirección de En Marea non descartan crear outra nova organización

Primeiro foi o BNG, logo AGE e, agora, semella que En Marea. Os críticos dos críticos dos críticos barallan crear unha nova organización logo da fractura interna que deixou o último plenario da formación.

Así, este sector enfrontado á actual coordinadora de En Marea comezou a reorganizarse tras o plenario do pasado 15 de xullo que evidenciou a fractura do partido instrumental co afianzamento de Luís Villares como líder. Tras esa cita, buscan "abrir un proceso" que lles permita "avanzar na construción do espazo plural" que, para eles, En Marea "non pode ser". 

E é que nesta asemblea, os documentos oficialistas defendidos polo equipo capitaneado polo exmagistrado lucense resultaron vencedores aínda que por unha axustada marxe. Este feito profundou na división existente no seo do partido instrumental entre a actual coordinadora e sectores de Anova ou Esquerda Unida, así como algunhas mareas municipais como a Marea Atlántica.

Deste xeito, despois deste plenario no que as ausencias dos alcaldes de Santiago e A Coruña, Martiño Noriega e Xulio Ferreiro, deixaron constar o seu distanciamento coa actual dirección, fontes críticas consultadas por Europa Press destacaron a súa intención de continuar "traballando" para "agrupar forzas" e configurar un proxecto "realmente común".

Para lograr este obxectivo, iniciaron a celebración de reunións a través das que aspiran a contar co apoio do "sector oficial de Anova", "da maioría das mareas municipais" así como "dos sectores de Podemos e de Esquerda Unida que acreditan na unidade popular". Ademais, non descartan que este novo proceso de "aglutinación" derive "na creación dunha "nova organización".

"Despois do plenario do 15 de xullo queda claro que En Marea xa non pode ser o espazo común", apuntaron estas fontes, que inciden en que, actualmente, o partido instrumental "non representa ao espazo común" senón que, "en todo caso, é un polo máis" da unidade popular.

'PROCESO 1 MAIO'

Por outra banda, mes e medio despois da asemblea de xullo, ademais, novos integrados en En Marea tamén avanzan na constitución como organización política do 'Proceso 1 de Maio', para o que prevén celebrar unha asemblea constituínte o día 16 de setembro en Santiago de Compostela na que aprobarán "uns textos, uns órganos e unha estrutura".

Respecto diso, en declaracións a Europa Press, un dos participantes, Iván Rodríguez, explicou que a idea deste movemento é "constituír unha organización política de ámbito xuvenil" que "vaia moito máis alá de disputas concretas".

Por iso, sinalou que o proceso rexeita "situarse" a favor ou en contra dos diferentes sectores enfrontados en En Marea. "Queremos aglutinar a mozos de todas as sensibilidades", sinalou este participante do 'Proceso 1 de Maio' que busca "seguir organizando a ruptura e construíndo a República das de abaixo".