Ciclistas denuncian novo atropelo en Pontevedra e tachan de "escusa" a versión do condutor

Medio cento de persoas concentrouse desde as 20,00 horas deste xoves ante a Subdelegación do Goberno de Pontevedra en solidariedade co ciclista atropelado o martes na parroquia de Salcedo por un condutor que se deu á fuga. Á protesta acudiron, entre outros, ciclistas e bombeiros (compañeiros do ferido), convocados polo colectivo Pedaladas, para reclamar medidas de protección.

O presidente de Pedaladas, Enrique Pérez, tachou de "escusa" a versión do condutor que se deu á fuga, que foi localizado o mércores pola Garda Civil, por dicir que non se decatou de que atropelara a este ciclista, que se atopa ingresado con varias costelas rotas.

A este respecto, Pérez sinala que o coche "está desfeito" e sostén que "non é de xustiza" que o condutor se marchase e non auxiliase o ciclista.

Neste sentido, mostrou as súas sospeitas de que o autor do atropelo conducise baixo os efectos do alcol ou drogas ao non deterse, á vez que lamenta que esa fuxida "lle sae gratis".

Respecto ao ciclista ferido, bombeiro de profesión, atópase illado na UCI ao ter risco de infección respiratoria por ter varias costelas rotas. Os seus compañeiros estiman que até dentro de ano ou ano e medio non poderá recuperarse.

REUNIÓN CON GRUPOS PARLAMENTARIOS

Así mesmo, membros de Pedaladas pediron entrevistarse con todos os grupos parlamentarios galegos para trasladar a súa demanda dunha maior protección para os ciclistas.

Entre outras cuestións, esixen á Administración melloras na estrada ao seu paso por Salcedo, onde se produciu o atropelo, xa que conta con tramos perigosos sen zonas seguras para ciclistas e peóns, vehículos aparcados de forma irregular e sen limitación de 50 quilómetros por hora.

Ademais, reclaman que se poña en marcha a medida impulsada o ano pasado no Congreso para equiparar a fuxida e omisión de socorro en accidentes de tráfico co positivo en alcol ou drogas co obxectivo de evitar as fugas.