Os sindicatos rexeitan a nova oferta da Xunta e manteñen a folga indefinida na Xustiza

A folga na Xustiza continuará, pendente de que a semana que vén volvan sentar Xunta e sindicatos, e despois de horas de negociacións con varios recesos e até tres propostas por parte da Administración galega: a última, 105 euros máis ao mes, de forma lineal para todos os corpos do sector —auxilios, tramitadores e xestores—, un incremento que empezaría a cobrarse parcialmente este 2018, alcanzando o total en tres anos.

Deste xeito, os funcionarios da Administración de Xustiza cobrarían 1.260 euros máis ao ano en 2020 e, segundo a Xunta, quedarían "por enriba" da media "dos 19 territorios, as 17 comunidades ou as autonomías con competencia transferida e o territorio Ministerio".

Con esta suba lineal, segundo a táboa que o comité de folga difundiu en febreiro (das 12 comunidades con competencia transferida e o 'territorio Ministerio'), co total do incremento que ofrece a Xunta, a suma do complemento autonómico transitorio (CAT) e da produtividade roldaría os 550 euros.

Isto significa que os xestores de Xustiza se situarían como oitavos na devandita táboa salarial, por diante de Asturias e diante de Valencia; mentres que os tramitadores estarían en cuarto posto (detrás de Cantabria e diante de Andalucía); e os auxilios tamén en cuarto posto (detrás de Cantabria e diante de Asturias).

Unha oferta previa, coa mesma masa salarial pero que facía subas distintas en función do corpo, situaba os xestores máis arriba na táboa. Os sindicatos contestaron cunha contraoferta, que rebaixa as súas pretensións a unha suba lineal de 190 euros máis ao mes, aínda distante dos 105 que expón a Xunta.

"Segue a folga porque a Xunta, lonxe de facer o esforzo que se lle pide desde todos os ámbitos, está a subir moi pouco as cantidades, mentres nós, na boa fe negociadora, baixamos máis. Que quede ben claro: se eles subiron 25 euros de media, nós baixamos 35 euros de media", resumiu Manuel Díaz (UGT), en nome do comité de folga.