Denunciado o presidente de NN.XX. de Camariñas por agresión ao director dun medio local

Diego Alonso Freire, director da publicación Camarinas.eu denunciou a quen é o presidente de Novas Xeracións (NN.XX.) en Camariñas e, ademais, presidente do Club Naútico nesta localidade, Martín Castiñeira, por telo agredido físicamente.

Martín Castiñeira, presidente de NN.XX de Camariñas, nunha visita que Diego Calvo e Miguel Tellado realizaron recentemente a Camariñas | Fonte: D.F.

Segundo informou Freire a GC, os feitos tiveron lugar hai un mes cando, supostamente, Castiñeira increpouno e logo bateu nel por unha información publicada no medio que dirixe sobre o Club Naútico. Despois deste incidente, o lesionado acudiu a un centro médico que corroborou que tiña lesións no ombreiro. Con ese parte médico, Freire presentou unha denuncia.

“Hai unhas semanas fun agredido polo Presidente do Club Náutico de Camariñas en presencia de testigos. Dita persona avalanzouse contra min por, segundo el, unha publicación que fixemos en Camarinas.eu con relación ao Club Náutico  que él preside. Evidentemente eu tiven que chamar a Guardia Civil e presentar denuncia con parte de lesións”, suliñou en declaracións a este medio.

Alonso Freire critica os malos modos de Castiñeira e denuncia que siga sendo líder local do PPdeG. De feito, hai uns días, o presidente provincial do PPdeG, Diego Calvo, xunto ao secretario xeral do PP de Galicia, Miguel Tellado, mantiveron un encontro con esta persoa nunha visita realizada a Camariñas.