Feijóo: "Non hai ningunha condena ao PP por corrupción"

O presidente da Xunta e líder dos populares galegos, Alberto Núñez Feijóo, asegurou que lle "repugnan" e que lamenta as "corruptelas descubertas" no Partido Popular. "É evidente que no seo do Partido Popular producíronse graves erros de control, por iso hai un ex-tesoureiro condenado e varios alcaldes condenados", manifestou.

Feijóo pronunciouse deste xeito durante a sesión de control do Parlamento de Galicia, escenario no que tamén pediu que non se "manipule" o que di a sentenza da Gürtel que, segundo indicou, di que "non hai ningunha condena" ao PP por "corrupción".

Con todo, o máximo mandatario autonómico non desvelou os seus plans de futuro e se optará a liderar o PP a nivel nacional, aínda que lles trasladou aos portavoces da oposición galega até en dúas ocasións que terán a oportunidade de seguir debatendo na "próxima sesión de control" da Cámara galega, "o 20 de xuño".

Todo iso nun pleno no que Feijóo retirou do diario de sesións unha afirmación que a portavoz nacional do BNG, Ana Pontón, cualificou de ataque á súa "dignidade".

En concreto, nunha resposta a Luís Villares (En Marea), o presidente da Xunta asegurou que lle "parecía que a señora Pontón estaba moi necesitada". "Díxenlle que non fixese como vostede, pero, evidentemente, vostede aínda está máis, señor Villares", asegurou o presidente ao dirixirse ao portavoz de En Marea, o que provocou a reacción da bancada da oposición.

SUCESOR DE RAJOY?

Feijóo, no que están todos os focos dado o seu protagonismo nas 'quinielas' para suceder a Mariano Rajoy, eludiu pronunciarse sobre o seu futuro político e lembrou que aínda non hai un congreso convocado no PP. Iso si, presionado pola oposición durante a sesión de control no Parlamento, remitiu ao próximo pleno ordinario, do 20 de xuño, para responder as preguntas sobre o seu futuro.

Un día despois de que Rajoy anunciase o seu adeus á Presidencia do PP, Feijóo eludiu dar pista algunha expresa sobre cal pode ser a súa decisión. Os portavoces da oposición, sobre todo Ana Pontón (BNG) e Xoaquín Fernández Leiceaga (PSdeG), esixíronlle que aclare o seu futuro, no marco DO debate sobre a sentenza da 'Gürtel', pero o tamén líder do PPdeG, sen descartar nin confirmar nada, limitouse a remitir á sesión plenaria do 20 de xuño.

"O 20 de xuño vou estar aquí, se me queren preguntar algo máis", indicou. Non tiveron máis sorte os xornalistas que lle preguntaron á saída do Parlamento, antes de que se dirixise a un acto oficial en Ourense. "Propóñolles que non insistan neste tipo de cuestión, vou cumprir a miña axenda como presidente da Xunta e non hai ningún congreso convocado", defendeu.

Feijóo mantivo a mesma  postura nun acto institucional en Ourense. "Cando teña algo que dicir, direino", manifestou aos medios que lle volveron a preguntar sobre o seu futuro político.

O mandatario autonómico manifestou, a preguntas dos xornalistas, após a inauguración do edificio do Campus da auga en Ourense, que este xoves tomarán decisións no Consello da Xunta, pero non quixo aclarar se decidiu optar a suceder a Mariano Rajoy á fronte do PP.

Pola súa banda, o conselleiro de Cultura, Educación e Ordenación Universitaria, Román Rodríguez, declarou minutos despois da finalización do acto que Feijóo "tomará a mellor decisión para el, para Galicia e para o Partido Popular". Non entanto, Román Rodríguez declinou pronunciarse sobre se o presidente da Xunta de Galicia comunicoulle ao seu equipo de goberno a decisión que tomará finalmente.