A Rapa das Bestas de Sabucedo trasladase por uns días a Santiago
Esta festa promociónase na capital galega cunha mostra ao aire libre que repasa a historia desta tradición que se remonta ao século XVI.
Por Galicia Confidencial | Compostela | 30/06/2018 | Actualizada ás 19:00
A Rapa das Bestas de Sabucedo (A Estrada) tomou o centro de Santiago de Compostela. A súa Alameda acolle unha exposición ao aire libre que repasa a historia desta tradición centenaria -remóntase ao século XVI- e que poderá visitarse ata o martes 3 de xullo.
Esta mostra enmárcase na campaña de divulgación que a Asociación Rapa das Bestas de Sabucedo está a intensificar nos últimos días para promocionar a Rapa 2018, que se celebrará entre os días 6 e 9 de xullo e que, como en anos anteriores, agarda reunir a máis de 20.000 persoas nun aldea de apenas 60 veciños.
Aínda que a programación de actividades arrincará xa na noite do xoves 5 coa IX Gala na honra e louvanza dos aloitadores, as actividades máis agardadas serán "a baixa" dos cabalos e bestas desde o monte na mañá do venres 6 e os curros do sábado 7 (19.00 horas), domingo 8 (12.00 horas) e luns 9 (12.00 horas). Nesta ocasión, a Asociación Rapa das Bestas de Sabucedo decidiu que unha parte da recadación do curro solidario do luns entregarase á Fundación Provincial do Banco de Alimentos, mentres que o resto destinarase á mellora das condicións de vida dos cabalos e eguas nos montes da contorna de Sabucedo.
O FESTIVAL RAPASONS
Na noite do venres tamén está programada unha nova edición do festival RapaSons, que presentará a actriz Isabel Risco e que contará a partires das 23.00 horas coas actuacións de Davide Salvado, Fillos do Estramonio, Festicultores e Liviao de Marrao. Ademais, durante toda a fin de semana a parroquia de Sabucedo acollerá distintas actividades musicais, culturais e de animación infantil.
Durante a inauguración da exposición ao aire libre na alameda compostelá, o presidente da Asociación Rapa das Bestas de Sabucedo, Henrique Bazal, destacou que ata a data de hoxe o gabinete de prensa da Rapa 2018 acreditou xa para cubrir os diferentes curros a máis de 70 profesionais da comunicación procedentes de oito países: España, Portugal, Francia, Italia, Países Baixos, México, Colombia e Estados Unidos.
