A Xunta considera que "avanzou" na negociación con axentes forestais e ambientais

A Consellería de Medio Rural afirma que "se avanzou" nas negociacións con axentes forestais e ambientais, cun acordo relativo a un aumento da retribución por produtividade. Así as cousas, prevé máis "contactos" nos próximos días.

Este colectivo, que reclama melloras nas súas condicións laborais, preavisou da convocatoria de folga do 25 ao 27 de xullo e dun paro que será indefinido a partir do 1 de agosto en caso de non chegar antes a un acordo coa Xunta.

Pola súa banda, fontes do departamento que dirixe Ángeles Vázquez sinalan que "se seguen perfilando" as condicións laborais (o encontro este martes foi coa Dirección Xeral de Función Pública).

A preguntas dos xornalistas, Vázquez indicou que espera que "impere a sensatez" e finalmente non haxa folga, xa que os galegos "non o entenderían" en plena campaña de alto risco contra os incendios forestais.