A balea azul, o animal máis grande do mundo, instálase en augas de Galicia

Confirmado: a balea azul atopou en augas galegas un refuxio. Logo de varios avistamentos sorprendentes o pasado ano, o Instituto para o Estudo dos Mamíferos Mariños (BDRI, polas súas siglas en inglés), con base no Grove, avistou este xoves un exemplar de Balaenoptera musculus —o animal máis grande do mundo— á altura da costa de Cariño.

Trátase dun exemplar xuvenil de 18 metros de lonxitude que na súa etapa madura pode chegar a medir entre 24 e 27 metros de lonxitude e pesar entre 100 e 120 toneladas, aínda que hai exemplares que case acadan os 30 metros e as 173 toneladas.

A identificación desta balea produciuse nun período espectacular de avistamentos para o BDRI, tras descubrir baleas comúns e alibrancas nas pasadas semanas e unha balea xibarte de hai uns días en Fisterra, ademais de preto de 3.000 golfiños comúns alimentándose á altura das illas Cíes onte.

O novo avistamento levaría a pensar que a presenza de baleas azuis en augas galegas non foi algo casual e anecdótico e estarían achegándose á nosa costa para dar conta dun bo banco de alimentos que para elas é un paraíso.