O goberno vigués abre expediente á concesionaria da zona azul tras iniciarse unha folga indefinida

O goberno municipal de Vigo abriu expediente sancionador á concesionaria Dornier, que xestiona o servizo de estacionamento en zona azul, por un incumprimento moi grave do contrato, após despedir a 8 operarios de forma improcedente. Así o confirmou en rolda de prensa o alcalde, Abel Caballero, quen denunciou a posición "extremadamente radical" da empresa, que se negou a revogar a súa decisión, obstaculizando a negociación cos traballadores, a pesar da mediación da autoridade laboral.

Ante esta situación, e dado que "o emprego non se toca" (o contrato contempla a subrogación de todo o cadro), a concellaría de Seguridade iniciou un expediente que pode concluír, segundo se recolle no prego, con sancións de entre 6.001 e 12.000 euros ou coa rescisión do contrato. "Non descarten nada", proclamou Caballero, quen incidiu que non tolerará despedimentos "inxustos" en ningunha de contratas do Concello.

FOLGA INDEFINIDA

Mentres, o cadro de Dornier en Vigo iniciou este martes unha folga indefinida para esixir a readmisión inmediata dos despedidos, e volveron a insistir en que levaban un ano advertindo de que esta situación se ía a producir, pola oferta "con baixa temeraria" presentada pola empresa, que asinou o novo contrato hai dous meses por máis de 23 millóns de euros.

Os portavoces dos traballadores confirmaron que a reunión coa mediación da Inspección de Traballo fracasou pola negativa da empresa a readmitir aos despedidos, e reclamaron ao Concello que "axilice" os trámites para rescindir o contrato e, en todo caso, que "presione" a Dornier para que reconsidere a súa decisión.

"Fai máis dunha semana que 8 traballadores están na rúa, acabáronse as palabras, queremos feitos", proclamaron, e avanzaron que manterán a folga e as mobilizacións até lograr o seu obxectivo. "Non hai acordo posible sen readmisión", recalcaron.

Por outra banda, lamentaron que "nunca antes houbo tanto sindicalista no goberno de Vigo" (en alusión aos concelleiros Manel Fernández, Santos Héctor Rodríguez, ou Carlos López Font, vinculados aos centrais CC.OO. e UXT), pero "os traballadores de contratas municipais están peor que nunca", e afearon ao alcalde que "aínda" non lles recibiu.