O pai de Diana Quer insiste na prisión permanente e no móbil sexual do crime contra a súa filla

Juan Carlos Quer, o pai da moza supostamente asasinada por José Enrique Abuín, alias 'O Chicle', sinala que o "modus operandi" e "único móbil" deste individuo é a agresión sexual tanto no caso da súa filla como no da moza de Boiro á que tentou secuestrar en decembro de 2015.

Así o indicou Quer tras coñecer o auto da titular do Xulgado de Primeira Instancia e Instrución número dous de Ribeira, que conclúe que Abuín é sospeitoso dun "delito de agresión sexual en concurso cun delito de detención ilegal", ambos en grao de tentativa, polo intento de secuestro da moza de Boiro.

"Con absoluto respecto ao procedemento, polo que se coñeceu do auto é evidente que existe na forma de actuar deste individuo un mesmo modus operandi e un único móbil: a agresión sexual", sinala Juan Carlos Quer nun comunicado.

Ao seu xuízo, trátase dun "depredador sexual" e asegura que o recente auto pon en conexión o crime da súa filla Diana, o caso da moza de Boiro e a instrución que se segue no xulgado número 2 de Noia por outro atentado contra a integridade sexual da irmá xemelga da súa muller, cando esta era menor de idade.

"É momento de facer xustiza con rigor, de ditar condenas con penas de cárcere axustadas á gravidade do delito cometido e de evitar que perigosos criminais saian á rúa mentres continúen sendo un perigo para as nosas fillas e fillos", asevera Quer.

Por iso, sinala que esta é a súa "loita" e a de case tres millóns de persoas que apoiaron, a través da plataforma Change.org, a petición da prisión permanente revisable para os autores de tales delitos, unha campaña que continúa aberta.