A Coordinadora Anti-Encoro de Caldas de Reis, Cuntis e Moraña acusa a Xunta de mentir sobre o estado do Umia

A Coordinadora Anti-Encoro de Caldas de Reis, Cuntis e Moraña non comparte a actuación de “lavado de cara” do Umia ó seu paso polo casco urbano, realizada a iniciativa local, ao "non afrontar o verdadeiro problema que padece o río e que ten a súa orixe augas arriba", expón.

A plataforma lamenta a "falta de valentía" para arranxar o problema e "liberar o río do atranco que o feríu de morte, cando os responsables da Xunta puxeron por diante os intereses económicos ao interese xeral".

A Coordinadora afirma que os responsables da Xunta "minten e mentiron no pasado" á poboación cando din que o encoro foi construido para abastecemento de auga e prevención de riadas.

Anuncian, ademais, que en breves datas darán a coñecer documentos oficiais que demostran esas "mentiras" e que deixarán "en evidencia" as declaracións pasadas e actuais dos responsables políticos.

Como adianto, a Coordinadora mostra parte dun documento que din que está asinado por dous altos responsables da Xunta no que figuran, entre outras, as seguintes afirmacións: “El embalse permitirá el desarrollo de zonas de esparcimiento y residenciales de ribera”, “… la utilización para el baño…”, “… la calidad de las augas del rio Umia es buena o muy buena…”

"Como por desgraza todos sabemos, nin auga boa ou moi boa, nin zonas de esparcemento", contradí a plataforma.

A Coordinadora considera unha "inxenuidade pensar que a Xunta vai facer ningún estudio para liberar o río do encoro, tal e como lle pediron os representantes municipais", xa que "dese estudio salería que a obra é inutil para o interese xeral e un atentado ambiental intolerable", conclúe.