Funcionarios de Teixeiro reclaman reforzos tras a agresión dun preso a tres funcionarios
O agresor, de relixión musulmá, convive con tres detidos nunha operación da Audiencia Nacional para desmantelar unha rede de presos islamitas.
Por E.P. | SANTIAGO DE COMPOSTELA | 11/10/2018 | Actualizada ás 14:06
Funcionarios do centro penal de Teixeiro (A Coruña) concentráronse ás portas do cárcere este xoves para reclamar que se reforcen as medidas de seguridade e expresar o seu apoio aos tres empregados agredidos por un interno o pasado mércores.
Tres funcionarios da prisión resultaron feridos de diversa consideración logo de ser agredidos por un interno de 24 anos do módulo 13 de Teixeiro. Segundo un comunicado da Agrupación dos Corpos da Administración de Institucións Penais, dous deles tiveron que ser evacuados en ambulancia após a agresión.
Os traballadores públicos lembran que este episodio tivo lugar na mesma zona na que, en marzo de 2017, un preso feriu a seis funcionarios. Trátase do número 13, un módulo de primeiro grao que "ten menos medidas de seguridade que o 15, onde se atopan os reclusos máis violentos".
Así, apuntan que "xeralmente" os internos que ocupan este módulo fano "como paso previo" a recuperar o segundo grao --réxime ordinario de vida-- debido a unha melloría no seu comportamento. No entanto, aseguran que os funcionarios "advertiran que non se daban tales circunstancias" e que "era cuestión de tempo que se producise un incidente de gravidade como en 2017".
CRÍTICAS A GRANDE-MARLASKA
A continuación, no seu comunicado, Acaip sinala que "este incidente" demostra "o pouco acertada" que foi a "primeira medida estrela" adoptada polo ministerio do Interior, Fernando Grande-Marlaska, para Institucións Penais "na que se restrinxen as medidas para controlar este tipo de internos violentos".
Ademais, mostran a súa "preocupación" polo feito de que o interno que provocou o incidente --"español pero de relixión musulmá e orixe magrebí"-- convivise no devandito módulo "con tres detidos en Teixeiro nunha operación da Audiencia Nacional para desmantelar unha rede de presos islamitas que pretendían abrir unha fronte de loita no interior dos cárceres, atacando aos seus traballadores".
Así as cousas, os funcionarios reclaman que este preso sexa trasladado a outro centro e que se adopten medidas para evitar agresións aos traballadores de Institucións Penais.
